Yanditswe na: NDAYISENGA Clement
07/06/2026 07:01
Ihuriro AFC/M23 rikomeje kugenzura ibice byinshi byo mu Ntara ya Kivu y’Amajyepfo muri Repubulika Iharanira Demokarasi ya Congo, ryashyizeho abayobozi bashya bazayobora inzego z’ibanze mu duce rigenzura, mu rwego rivuga ko rugamije kunoza imiyoborere n’imitangire ya serivisi ku baturage.
Izi mpinduka zatangajwe ku wa 6 Kamena 2026, aho abayobozi bashya bahawe inshingano mu Mujyi wa Bukavu, muri za teritwari zitandukanye ndetse no mu mijyi mito iri muri iyi ntara.
Kyalangalilwa Mulondani Nicolas yagizwe Meya mushya w’Umujyi wa Bukavu, mu gihe Nyota Luandja Celine yagizwe Meya wungirije. Komine eshatu zigize uyu mujyi, ari zo Bagira, Ibanda na Kadutu, na zo zashyiriweho ba Burugumesitiri n’ababungirije babo.
Gusa, Komine za Panzi na Kasha zo ntizigeze zitangazwa mu zahawe abayobozi bashya.
Mu zindi nzego, Ntambuka Pascal yagizwe Umuyobozi wa Teritwari ya Idjwi, yungirizwa na Bulikoko René, mu gihe Elie Rubabura Espoir yagizwe Umuyobozi wa Teritwari ya Kabare, yungirizwa na Kasindi Kingombe Benjamin.
Teritwari ya Kalehe yahawe Buseyi Jean Bosco nk’umuyobozi mushya, yungirizwa na Muhamuka Mweze Amza. Umujyi muto wa Minova wo uzayoborwa na Sengimana Ruhungande Augustin, afatanyije na Mahombi Mutumai wagizwe umwungirije.
Umuhuzabikorwa Mukuru wa AFC/M23, Corneille Nangaa Yobeluo, yavuze ko gushyiraho aba bayobozi byari ngombwa kuko ibice byinshi byari bimaze igihe kirekire bidafite abayobozi b’inzego z’ibanze.
Yagize ati: “Hari ibice byari bimaze igihe kirenga umwaka bidafite abayobozi. Byari ngombwa ko hashyirwaho inzego z’ubuyobozi kugira ngo ibikorwa bya buri munsi bikomeze kandi abaturage babone serivisi zibegereye.”
AFC/M23 yatangiye kugenzura ibice byinshi byo muri Kivu y’Amajyepfo mu ntangiriro za 2025. Nyuma yo kubifata, yashyizeho Emmanuel Birato Rwihimba nka Guverineri w’Intara kugira ngo ayobore ibikorwa by’ubuyobozi, ariko muri Kamena 2025 aza gusimburwa na Patrick Busu Bwa Ngwi Nshombo, ukomeje kuyobora iyi ntara mu izina ry’iri huriro.
Iyi gahunda yo gushyiraho abayobozi bashya ifatwa nk’intambwe nshya ya AFC/M23 mu gukomeza gutegura no gucunga ibice igenzura, mu gihe hakomeje ibiganiro n’imbaraga za dipolomasi zigamije gushaka umuti urambye w’umutekano mu burasirazuba bwa RDC.
Like This Post? Related Posts
