Yanditswe na: NSENGIYUMVA J Damascene
30/01/2026 06:50
Perezida w’Inama y’Abaminisitiri ya Togo, Faure Essozimna Gnassingbé yageze mu Rwanda mu ijoro ryo ku wa 29 Mutarama 2026.
Gnassingbé uri mu
ruzinduko mu Rwanda, yakiriwe na Minisitiri w’Ububanyi n’Amahanga, Olivier
Nduhungirehe.
Itangazo ryashyizwe kuri X na Minisiteri y’Ububanyi n’Amahanga
rigira riti “Kuri uyu mugoroba Perezida w’Inama y’Abaminisitiri ya Togo, Faure
Essozimna Gnassingbé yageze i Kigali mu ruzinduko ajemo. Yakiriwe na Minisitiri
w’Ububanyi n’Amahanga.”
Inshuro nyinshi Perezida Gnassingbé akunze kugenderera u Rwanda.
Muri Mata 2025 ni bwo Perezida Kagame yakiriye Gnassingbé, wari uherutse
gushyirwaho n’Umuryango wa Afurika Yunze Ubumwe (AU) nk’umuhuza ku bibazo byo
mu Burasirazuba bwa RDC.
Ni uruzinduko rwari rugamije gushimangira ubushake bwa
Gnassingbé mu gukorana n’abandi bafatanyabikorwa mu gushaka igisubizo kirambye
ku makimbirane ari hagati y’u Rwanda na RDC.
Icyo baganiriye ku ntambwe imaze guterwa mu biganiro by’akarere
bigamije kugashakira amahoro arambye.
Ku wa 24 Werurwe 2025 ni bwo Ibiro by’Umukuru w’Igihugu wa
Angola byatangaje ko Perezida João Lourenço atakiri umuhuza mu bibazo bya RDC
n’u Rwanda ahubwo agiye gushyira imbaraga muri gahunda zireba umugabane wose
aho kwita ku karere kamwe.
Nyuma Perezida Lourenço yagejeje ku bayobozi b’Umuryango wa
Afurika Yunze Ubumwe (AU) dosiye ya Gnassingbé nk’uwari umukandida ku mwanya
w’umuhuza barayisuzuma.
Mu ntangiriro za Mata 2025 AU yagaragaje ko ushyigikiye icyifuzo
cya João Lourenço wa Angola ko Gnassingbé amusimbura ku mwanya w’umuhuza mu
biganiro bihuza u Rwanda na RDC.
Ku wa 12 Mata 2025 Inteko Rusange ya AU yagize Gnassingbé
bidasubirwaho umuhuza uzafasha u Rwanda na RDC gukemura amakimbirane bifitanye.
Gnassingbé yakunze gusura u Rwanda inshuro nyinshi haganirwa ku
ngingo zitandukanye zirimo ibijyanye n’umutekano n’ubufatanye hagati y’ibihugu
bya Afurika.
No muri Mutarama 2025 Perezida Gnassingbé na bwo yari i Kigali
mu ruzinduko rw’akazi rw’iminsi ibiri mu Rwanda, bemeranya kurushaho guteza
imbere imikoranire y’ibihugu byombi.
Muri iyi myaka ishize umubano wa Rwanda na RDC wazambye,
biturutse ku ntambara iri kubera mu Burasirazuba bwa RDC, aho Kinshasa
irushinja gufasha ihuriro rya AFC/M23 rukagaragaza ko ari ukwihunza inshingano
zayo zo kubanisha Abanye-Congo ahubwo ikagira uruhare mu kubica no kubagirira
nabi.
U Rwanda na rwo rushinja RDC gufasha no gukorana n’umutwe
w’iterabwoba wa FDLR ugizwe n’abagize uruhare muri Jenoside yakorewe Abatutsi
mu 1994, n’ubu ugifite umugambi wo kuruhungabanyiriza umutekano.
Mu minsi ishize AU yagabanyije inshingano abahuza b’Abanyafurika
mu makimbirane yo mu burasirazuba bwa Repubulika Iharanira Demokarasi ya Congo.
Icyemezo cyo kugabanya abahuza inshingano cyafatiwe mu nama yiga
ku mutekano w’uburasirazuba bwa RDC, yahurije abafatanyabikorwa mu mujyi wa
Lomé muri Togo, kuva tariki ya 16 kugeza ku ya 17 Mutarama 2026.
Ku ruhembe rw’ubu buhuza hariho Perezida w’Inama y’Abaminisitiri ya Togo, Faure Essozimna Gnassingbé. Imirimo y’ubuhuza azajya ayifashwamo n’itsinda ryo muri Minisiteri y’Ububanyi n’Amahanga n’ibiro bye.
Like This Post? Related Posts
