• Ni agasaku kadashobora kugira icyo kageraho – Perezida Kagame agaruka ku ngendo za Habyarimana i Kinshasa (VIDEO)

Perezida wa Repubulika, Paul Kagame yakuriye inzira ku murima abarimo umuhungu wa Habyarimana Juvenal n’abandi bakomeje kujya guhura na Perezida Felix Tshisekedi wa DRC, ibi umukuru w’u Rwanda yabyise “Agasaku kadashobora kugira icyo kageraho.”

Yabigarutseho mu ijambo yagejeje ku bitabiriye umuhango wo gutangiza icyumweru cy’icyunamo n’iminsi 100 yo kwibuka ku nshuro ya 32 Jenoside yakorewe Abatutsi mu 1994.

Ni Perezida Kagame kandi wanasobanuye ko ingamba z’ubwirinzi z’u Rwanda zihora zamaganwa na Congo zidashobora gukurwaho kuko ari ubwirinzi bwatangijwe nyuma y’intambara y’abacengezi,

Ati “Ingamba zacu z’ubwirinzi zashyizweho kugira ngo ibyo bitero bitongera gukorwa ku mipaka yacu, iki si ikibazo cyo guharirwa u Rwanda rwonyine, kubiruharira gutyo ni ugushimisha ababiri inyuma maze u Rwanda rugahanirwa guhaguruka rukirwanaho.”

Umukuru w’Igihugu agereranya iki kibazo nk’igihe umurima w’umuhinzi waramuka ufashwe n’inkongi hanyuma abandi bahinzi aho kumutabara bakamwumvisha ko iyo nkongi iza kuzima bagakomeza kurebera bakanamubuza kwirwanaho ngo abe yazimya iyo nkongi.

Ati “Ntabwo twakwemera gusubiramo amakosa y’ahahise, Ingengabitekerezo ya Jenoside ikomeje gukwirakwizwa mu karere kacu, biramutse bidasuzumwe bishobora kudusubiza aho twavuye. “

Yasobanuye ko inkomoko y’ingengabitekerezo n’urwango ku batutsi bikomoka ku bahoze barwanirira Leta yateguye ikanashyira mu bikorwa Jenoside yakorewe Abatutsi mu 1994 baje gutsindwa bagahungira muri Congo anashimangira ariko ko ibyo abo bibumbiye muri FDLR bakora byose bidashobora gucecekesha u Rwanda, ati ““Ntushobora kuducecekesha mu gihe hari ikitameze neza. “

Agaruka ku ngendo za Jean Luc Habyarimana akaba umuhungu wa Juvenal Habyarimana wahoze ayobora u Rwanda akanategura Jenoside, Perezida Kagame yagize ati “Yewe n’urwo rusaku mwumva rw’abantu bahurira za Burayi n’ahandi hatandukanye no guhurira muri Kinshasa, bakazana umuhungu wa Habyarimana n’abandi bo mu muryango we n’abandi bavuye hehe na he… ibyo byose ni agasaku. Nta kintu bizageraho gishobora kuzaba hano cyo muri ubwo buryo.”

Kurikira ijambo rya Perezida Kagame ryose muri iyi VIDEO ikurikira.

U Rwanda n' isi yose kuri ubu hatangijwe ibikorwa byo kwibuka ku nshuro ya 32 Jenoside yakorewe Abatutsi mu 1994, uyu aba ari umwanya wo kuzirikana amateka ashaririye igihugu cyanyuzemo ari ko hanakomeza gutekerezwa ku ngamba no kwiyemeza byatuma ibi bitongera kuba yaba mu Rwanda cyangwa n'ahandi hose ku isi, bikaba bikomeje gukorwa ku nsanganya matsiko igira iti "Twibuke Twiyubaka."

Like This Post?

• Share On:

Related Posts

---