• Perezida Kagame ategerejwe mu ruzinduko rw’akazi muri Botswana

Perezida wa Repubulika y’u Rwanda, Paul Kagame, ategerejwe i Gaborone mu Botswana, aho azagirira uruzinduko rw’iminsi ibiri kuva tariki ya 04 kugeza ku ya 05 Gicurasi 2026. Uru ruzinduko rugamije gukomeza gutsura umubano n’ubufatanye hagati y’ibihugu byombi, rukaba rwaratumiwemo na Perezida wa Botswana, Duma Gideon Boko.

Nk’uko byatangajwe na Perezidansi ya Botswana ku wa 29 Mata 2026, uru ruzinduko ruzabanza n’inama ya kabiri y’Ihuriro rihoraho rihuza u Rwanda na Botswana mu bufatanye (JPCC), izaba hagati ya tariki ya 04 n’iya 05 Gicurasi. Iyi nama igaragaza ubushake bw’impande zombi bwo gukomeza kubaka ubufatanye bufite icyerekezo kandi butanga umusaruro ugaragara.

Perezida Kagame na mugenzi we bazagirana ibiganiro byihariye bizibanda ku nzego zitandukanye zirimo ubucuruzi bushingiye ku ikoranabuhanga, ubukerarugendo, ubuvuzi bw’amatungo cyane cyane inkingo, ingendo n’ubwikorezi, ndetse n’ubufatanye mu kongerera agaciro amabuye y’agaciro arimo diyama.

Muri uru ruzinduko kandi, biteganyijwe ko Perezida Kagame azasura uruganda rwa diyama rwa Diamond Trading Company Botswana (DTCB), rumwe mu bigo bikomeye mu bucuruzi bw’amabuye y’agaciro muri iki gihugu.

U Rwanda na Botswana bizanasinyana amasezerano atandukanye arimo ajyanye n’ubucuruzi n’ishoramari, ubufatanye hagati ya Botswana Investment and Trade Centre na Rwanda Development Board, ndetse n’amasezerano yo kwirinda gusoresha kabiri agamije koroshya ishoramari n’ubucuruzi hagati y’impande zombi.

Ku wa 5 Gicurasi 2026 hazanaba ihuriro ry’abikorera (Business Forum) rizahuza abashoramari n’abayobozi mu nzego zitandukanye, hagamijwe gushakira hamwe amahirwe y’ishoramari no kwagura ubucuruzi.

Perezida Kagame azaherekezwamo n’intumwa zirimo Abaminisitiri, abayobozi bakuru mu nzego za Leta n’abahagarariye abikorera.

Uru ruzinduko rwubakiye ku musingi w’urwo Perezida Kagame yagiriye muri Botswana muri Kamena 2019, aho yakiriwe na Perezida w’icyo gihe, Mokgweetsi Masisi, bagirana ibiganiro byashyizeho umusingi w’imikoranire ikomeje gutezwa imbere kugeza ubu

 

Like This Post?

• Share On:

Related Posts

---