• Minisitiri w’Intebe Dr. Nsingiyumva azahagararira Perezida Kagame irahira rya Museveni

Minisitiri w’Intebe, Dr. Nsingiyumva Justin, azahagararira Perezida Paul Kagame mu muhango w’irahira rya Yoweri Kaguta Museveni watorewe gukomeza kuyobora Uganda muri Mutarama 2026.

Dr. Nsengiyumva yageze ku kibuga mpuzamahanga cy’indege cya Entebbe muri Uganda kuri uyu wa 11 Gicurasi, yakirwa n’Umunyamabanga wa Leta ushinzwe Umujyi wa Kampala, Kyofatogabye Kabuye.

Museveni wari uhagarariye ishyaka NRM, yahatanye n’abakandida barindwi barimo Robert Kyagulanyi Ssentamu uzwi nka Bobi Wine, Nandala Mafabi na Mugisha Muntu.

Komisiyo ya Uganda ishinzwe amatora yatangaje ko Museveni yatsinze ku majwi 71,65%, akurikirwa na Bobi Wine wagize 24,72%, Mafabi agira 1,88%, abandi basaranganya amajwi asigaye.

Biteganyijwe ko umuhango w’irahira rya Perezida Museveni ubera ku kibuga cya Kololo ku wa 12 Gicurasi 2026, aho witabirwa n’abakuru b’ibihugu ndetse n’abandi banyacyubahiro barimo abahagarariye za guverinoma.

Ku Rwanda, kujya muri uyu muhango kwa Minisitiri w’Intebe Dr. Nsengiyumva birenze kwitabira, kuko ni no gushimangira umubano mwiza umaze imyaka myinshi hagati y’ibihugu byombi.

U Rwanda na Uganda byifatanya mu nzego zirimo umutekano n’ubucuruzi. Ku wa 22 Mata 2026, byagiranye amasezerano mashya y’ubufatanye mu guteza imbere urwego rw’ubuzima, ubuhinzi, uburezi n’imiyoborere mu nzego z’ibanze.

 

Like This Post?

• Share On:

Related Posts

---