• Amavubi yisanze mu itsinda K ririmo Cape Verde, Mali na Liberia mu gushaka itike ya AFCON 2027

Ikipe y’Igihugu y’u Rwanda, Amavubi, yamenye abo izahura nabo mu rugendo rwo gushaka itike y’Igikombe cya Afurika cya 2027 kizabera mu bihugu bitatu byo muri Afurika y’Iburasirazuba birimo Kenya, Uganda na Tanzania.

Muri tombola yabereye i Cairo kuri uyu wa Kabiri tariki ya 19 Gicurasi 2026, u Rwanda rwashyizwe mu Itsinda K hamwe na Cape Verde, Mali na Liberia.

Aya matsinda yashyizwe hanze n’Ishyirahamwe ry’Umupira w’Amaguru muri Afurika, CAF, aho amakipe 48 yagabanyijwe mu matsinda 12 agizwe n’amakipe ane buri rimwe.

Amavubi azaba afite akazi gakomeye cyane kuko Mali na Cape Verde ari amakipe amaze iminsi yitwara neza ku rwego rwa Afurika, mu gihe Liberia nayo ikomeje kuzamura urwego rw’umupira wayo.

Imikino yo gushaka itike y’Igikombe cya Afurika cya 2027 biteganyijwe ko izatangira muri Nzeri 2026, aho amakipe azakina imikino ibanza n’iyo kwishyura kugeza habonetse azahagararira Afurika muri iri rushanwa rikomeye.

Ikipe ebyiri za mbere muri buri tsinda ni zo zizahita zibona itike yo gukina Igikombe cya Afurika cya 2027, kizaba kibaye ku nshuro ya mbere cyakiriwe n’ibihugu bitatu icyarimwe byo muri Afurika y’Iburasirazuba.

 

Like This Post?

• Share On:

Related Posts

---