• Ingabire Victoire yasubiye mu rukiko avuga ko yimwa uburenganzira bwe aho afungiye

Ahagana Saa Tatu za mu gitondo (9h00') kuri uyu wa mbere, Victoire Ingabire Umuhoza, uregwa ibyaha birimo umugambi wo guhungabanya ubutegetsi bw’u Rwanda, yagejejwe ku Rukiko Rukuru urugereko rwa Kigali ruherereye i Nyamirambo, mu Karere ka Nyarugenge.

Ageze mu cyumba cy’iburanisha kuri uyu wa Mbere, tariki ya 15 Kamena 2026, Ingabire yari yambaye ikanzu y’iroza, agaragara ari mu mwuka mwiza, asuhuzanya n’abari baje gukurikirana urubanza mu gihe inteko iburanisha yari itaricara.

Mu gihe urubanza rwarimo gutegurwa gutangira, yari kumwe n’abanyamategeko be barimo Me Gashabana, Bruce Bikotwa na Félicien Gashema, baganira mu gutegereza.

Urubanza rutangiye, Ingabire yasabye ko rutakomeza kuri uwo munsi, asobanura ko hari ibibazo bikomeye bimureba mu ifungwa rye.

Yavuze ko yimwa uburenganzira bwo guhura n’abandi bareganwa mu rubanza rumwe, ndetse no kutemererwa kuvugana n’umuryango we. Yanavuze kandi ko atemererwa gusenga, ibintu avuga ko bimugiraho ingaruka ku buzima bwe bwo mu mutwe, mu myemerere no ku mubiri.

Yasabye ko urukiko rwafata icyemezo kuri ibyo bibazo mbere y’uko urubanza rukomeza.

Muri Kamena umwaka ushize, urukiko rwari rwategetse ko Ingabire atabwa muri yombi akaburanishwa hamwe n’abandi icyenda bamaze imyaka hafi itanu bafunzwe, bakekwaho kuba abarwanashyaka b’ishyaka rye DALFA–Umurinzi, ritaremerwa mu mategeko.

Icyo gihe, yari yitabye urubanza nk’umutangabuhamya mu rubanza ruregwamo abo bantu, ariko nyuma y’ibyemezo by’urukiko n’imitongero y’ubwunganizi bwe ku ifungwa rye, ni bwo yaje gutangira kuburanishwa nk’umwe mu baregwa.

Ingabire aregwa hamwe n’abo bafatanije ibyaha birimo amahugurwa agamije guhirika ubutegetsi hatifashishijwe intwaro, gushinga umutwe w’abagizi ba nabi, gukwirakwiza ibihuha bigamije kwangisha abaturage ubutegetsi, no guteza imvururu muri rubanda.

We n’abamwunganira bahora bahakana ibyo aregwa, bavuga ko hari ibyaha yigeze kubazwa kera ariko ntihagire ingaruka zabyo, bakavuga ko ibyo aregwa bidafite ishingiro.

Like This Post?

• Share On:

Related Posts

---