Yanditswe na: NDAYISENGA Clement
27/06/2026 07:46
Ikigo cy’Igihugu gishinzwe Ubuhinzi n’Ubworozi (RAB) cyatangaje ko cyashyize mu kato amatungo arimo inka, ihene n’intama mu turere dutandatu two mu gihugu kubera icyorezo cy’indwara y’ubuganga bwo mu Kibaya cya Rift (Rift Valley Fever – RVF).
Uturere twashyizwe mu kato ni Rulindo, Burera, Gicumbi two mu Ntara y'Amajyaruguru, Kirehe, Kayonza na Rwamagana two mu Ntara y'Iburasirazuba.
Mu ibaruwa RAB yandikiye utwo turere ku wa Gatanu, tariki ya 26 Kamena 2026, yasabye ko hafatwa ingamba zihutirwa zo gukumira ikwirakwira ry’iyi ndwara nyuma y’uko ibizamini bya laboratwari byagaragaje ko hari amatungo yanduye mu turere twa Kirehe, Kayonza, Gicumbi, Rwamagana, Rulindo na Burera.
Umuyobozi Mukuru w’agateganyo wa RAB, Dr. Florence Uwamahoro, yavuze ko ibisubizo by’ibipimo byagaragaje ko iyo ndwara iri mu matungo yo muri utwo turere, bityo hakenewe ingamba zikomeye zo kuyikumira.
Yagize ati: “Dushingiye ku bisubizo by’ibizamini bya laboratwari byafashwe ku nka zororerwa mu turere twa Kirehe, Kayonza, Gicumbi, Rwamagana, Rulindo na Burera, byagaragaje ko ayo matungo yanduye indwara y’ubuganga bwo mu Kibaya cya Rift.”
RAB yasabye abayobozi b’uturere gushyira mu bikorwa ingamba zikomeye zirimo kumenyesha ubuyobozi vuba itungo ryose rigaragaza ibimenyetso by’indwara, birimo umuriro mwinshi, kunanirwa kw’itungo ndetse no kuva amaraso mu myanya inyuranye y’umubiri, cyane cyane mu mazuru.
Iri tangazo rivuga ko amatungo yose arimo inka, ihene n’intama mu turere twavuzwe agomba kuguma aho yororewe, kandi nta tungo ryemerewe kwimurwa rivanwa mu karere kamwe rijyanwa mu kandi mu gihe cy’iyi kato.
RAB yanatangaje ko inkingo z’iyi ndwara zigomba gutangwa ku matungo yose mu gihe kitarenze iminsi irindwi, mu rwego rwo kuyirinda no kuyikumira.
Aborozi basabwe kandi gukoresha imiti yica imibu ikwirakwiza iyi virusi, byibura kabiri mu cyumweru, ndetse n’abita ku matungo bakambara ibikoresho bibarinda mu rwego rwo kwirinda kwandura.
RAB yanahagaritse by’agateganyo ibikorwa byo kubaga inka, ihene n’intama muri utwo turere dutandatu kugeza igihe hazakorerwa isuzuma rizemeza ko ibikorwa byo kubaga bishobora gusubukurwa mu mutekano.
Like This Post? Related Posts
