Yanditswe na: NDAYISENGA Clement
04/07/2026 11:33
Umutwe witwaje intwaro wa MRDP-Twirwaneho watangaje ko wongeye kwigarurira agace ka Point-Zéro, kari kamaze igihe gakoreshwa nk'ibirindiro bikomeye by'Ingabo za Repubulika Iharanira Demokarasi ya Congo (FARDC) n'Ingabo z'u Burundi mu Ntara ya Kivu y'Amajyepfo.
Nk'uko byatangajwe na Col. Fidele Rugabo, umwe mu bayobozi bakuru ba Twirwaneho, ibikorwa byo gufata ako gace byarangiye mu rukerera rwo kuri uyu wa 04 Nyakanga 2026, ahagana saa munani n'iminota 35 z'ijoro.
Yagize ati: "Ibikorwa bya gisirikare muri Point-Zéro birangiye aka kanya saa munani n'iminota 35. Point-Zéro, Baruta, Kalonge, Bicumbi na Rubemba byafashwe. Abanzi bakwiye imishwaro mu buryo burindwi."
Col Rugabo yavuze ko abarwanyi ba Twirwaneho bafatanyije na M23 batsinze ihuriro rigizwe na FARDC, Ingabo z'u Burundi, umutwe wa FDLR n'imitwe ya Wazalendo.
Yanahaye ubutumwa abaturage bo mu bice bya Fizi na Baraka, agaragaza ko ibikorwa bya gisirikare bishobora gukomereza no muri ibyo bice.
Uku kwigarurira Point-Zéro gukurikiye ifatwa ry'utundi duce tw'ingenzi two mu nkengero za Komini Minembwe, turimo Mikenke na Bilalombili, twafashwe ku wa 1 Nyakanga 2026.
Point-Zéro ni agace gafite akamaro gakomeye mu rwego rwa gisirikare kuko gaherereye ku masangano y'inzira zihuza uduce twinshi twa Kivu y'Amajyepfo.
Gahuza inzira zerekeza mu Mujyi wa Uvira, Santere ya Minembwe, Mikenke ndetse no mu mijyi ya Fizi na Baraka, bigatuma ari ahantu h'ingenzi mu kugenzura ibikorwa bya gisirikare muri ako karere.
Twirwaneho na M23 byakunze gushinja ihuriro ry'ingabo za Leta ya RDC gukoresha Point-Zéro nk'icyicaro cyo guteguriramo ibitero byagabwaga ku bice bituwe n'Abanyamulenge, cyane cyane Minembwe na Mikenke.
Si ubwa mbere Twirwaneho ifashe Point-Zéro. Ku wa 17 Mutarama 2026, uyu mutwe wari wamaze kuyigarurira, ariko uza kuhamburwa nyuma y'ibitero bikomeye byakozwe hifashishijwe drones n'abasirikare b'umutwe udasanzwe wa FARDC uzwi ku izina rya Hiboux.
Kuri iyi nshuro, Twirwaneho ivuga ko yongeye kuyigarurira nyuma y'imirwano ikomeye yabereye muri ako gace.
Col. Fidele Rugabo, umwe mu bayobozi bakuru ba Twirwaneho, yatangaje ko MRDP Twirwaneho yongeye kwigarurira Point-Zéro
Like This Post? Related Posts
