Yanditswe na: NDAYISENGA Clement
19/08/2026 19:16
Umuryango w’Ubwirinzi bw’Amajyaruguru ya Atlantika (OTAN/NATO) watangaje ko ufite ubushobozi n’ingamba bihagije byo guhangana n’igikangisho icyo ari cyo cyose cyaturuka muri Irani, ndetse ko uzafata ingamba zikwiye mu rwego rwo kurinda ibihugu biwugize.
Ibi byatangajwe n’umwe mu bakozi bakuru ba OTAN, nyuma ya raporo y’ikinyamakuru Financial Times yavugaga ko Irani ishobora gutekereza kugaba ibitero ku birindiro bya gisirikare bya Leta Zunze Ubumwe za Amerika biherereye mu bihugu by’u Burayi, mu gihe Perezida Donald Trump yaba yongeye gutegeka ibitero kuri Irani.
Uwo muyobozi wa OTAN yavuze ko ubushobozi bw’uyu muryango mu bijyanye no kwirinda no kurwanaho bukomeye kandi bwizewe. Yatanze urugero rw’uko mu ntangiriro z’uyu mwaka, uburyo bwo gutahura no guhanura ibitero byo mu kirere bwa OTAN bwafashije mu gufata no gukumira ibisasu bya misile byaturukaga muri Irani byari byerekejwe muri Turukiya, mu bitero bine bitandukanye.
Raporo ya Financial Times, ishingiye ku makuru yatanzwe n’abantu bavuga ko bazi ibitekerezo biri muri guverinoma ya Irani, ivuga ko Tehran yaba iri gusuzuma uburyo yakibasira ibirindiro n’ibikoresho bya gisirikare bya Amerika biri ku mugabane w’u Burayi, mu gihe Amerika yaba yongeye gukaza ibitero kuri Irani.
Iyo raporo ivuga kandi ko inzego za gisirikare za Irani zaba zaratangiye gusuzuma ibirindiro n’ibikoresho bya Amerika biri mu bihugu bimwe byo mu majyepfo y’uburasirazuba bw’u Burayi. Muri ibyo bihugu harimo Bulgaria, aho ibirindiro byayo bya gisirikare byagiye bifasha indege za Amerika mu bikorwa byo kongera lisansi.
Nubwo raporo ivuga ku bishoboka, kugeza ubu ibyo bivugwa ntibihamya ko Irani yafashe icyemezo cya nyuma cyo kugaba ibitero ku birindiro bya Amerika biri ku butaka bw’ibihugu bya OTAN.
OTAN ishimangira ko igitero ku gihugu kimwe mu bigize uyu muryango gishobora kugira ingaruka ku mutekano w’umuryango wose, bityo ko ikomeje gukurikirana hafi ibibazo by’umutekano bifitanye isano n’umwuka mubi uri hagati ya Washington na Tehran.
Iki kibazo gikomeje gutera impungenge ku rwego mpuzamahanga, kuko igitero cya Irani ku birindiro bya Amerika biri mu bihugu bigize OTAN gishobora guteza ikibazo gikomeye hagati ya Tehran n’ibihugu bigize uwo muryango, cyane cyane mu gihe umwuka w’intambara mu Burasirazuba bwo Hagati ukomeje kuba mubi.
Like This Post? Related Posts
