Yanditswe na: NDAYISENGA Clement
24/08/2026 09:36
Ubutegetsi bwa Repubulika Iharanira Demokarasi ya Congo (RDC) n’umutwe wa M23 bumvikanye ku gahunda nshya igamije gukomeza ibiganiro byo gushaka amahoro arambye no guhosha amakimbirane amaze imyaka myinshi mu burasirazuba bw’iki gihugu.
Iyo myanzuro yafashwe nyuma y’iminsi itanu y’ibiganiro byabereye mu Busuwisi, aho impande zombi zagaragaje ubushake bwo gukomeza inzira y’ibiganiro no gushaka ibisubizo bya politiki ku bibazo bikomeje guteza umutekano muke.
Mu itangazo ryashyizweho umukono n’impande zombi, bemeranyije gushyiraho uburyo buhoraho bwo gukurikirana no kugenzura iyubahirizwa ry’agahenge, ndetse no gukemura ibibazo bishobora kuvuka mu gihe cyo gushyira mu bikorwa ibyo bumvikanyeho.
Iyi gahunda nshya ishingiye ku masezerano y’amahoro yasinyiwe i Washington mu 2025, ayobowe na Perezida wa Leta Zunze Ubumwe za Amerika, Donald Trump. Gusa, nubwo ayo masezerano yasinywe, imirwano yakomeje kugaragara mu bice bitandukanye byo mu burasirazuba bwa RDC.
Impande zombi kandi zemeranyije ku ntambwe zizakurikiza mu ishyirwa mu bikorwa ry’amasezerano, ndetse hashyirwaho igihe ntarengwa kuri buri cyemezo. Ziyemeje kandi gukoresha ibiganiro n’uburyo bushya bwo gukemura ibibazo bishobora kubangamira inzira y’amahoro.
Mu rwego rwo gukurikirana agahenge, hashyizweho itsinda rishinzwe kugenzura no gutanga raporo ku bantu cyangwa imitwe izaba yarenze ku byemeranyijweho. Itsinda rya mbere riteganyijwe kujya i Minembwe kuri uyu wa mbere, mu Ntara ya Kivu y’Amajyepfo, kugira ngo risuzume uko agahenge kari kubahirizwa.
Nubwo impande zombi zimaze kugirana amasezerano y’agahenge inshuro zitandukanye, imirwano yakomeje rimwe na rimwe muri Kivu y’Amajyaruguru na Kivu y’Amajyepfo. Buri ruhande rukomeza gushinja urundi kutubahiriza ibyo rwiyemeje.
Ibiganiro byitabiriwe n’abahagarariye RDC na M23, ndetse na Qatar, Leta Zunze Ubumwe za Amerika, Togo, Komisiyo y’Umuryango wa Afurika Yunze Ubumwe n’Ubusuwisi bwakiriye ibiganiro.
Aya makimbirane kandi akomeje kugira aho ahurira n’umwuka mubi umaze igihe hagati ya RDC n’u Rwanda. U Rwanda rushinja RDC kutagira ubushake buhagije bwo gukuraho burundu umutwe wa FDLR, ruvuga ko uwo mutwe ushobora gukomeza kubangamira umutekano warwo.
Nubwo amasezerano mashya atanga icyizere cy’uko ibiganiro bishobora gukomeza, ibibazo bikomeye biracyari ku meza, birimo ibihano byafatiwe M23, ikibazo cy’abafunzwe ndetse n’igihe n’uburyo amavugurura ya politiki azashyirwa mu bikorwa.
Icy’ingenzi kuri ubu ni uko impande zombi zagaragaje ubushake bwo gukomeza ibiganiro, mu gihe akarere gakomeje gutegereza ko ayo masezerano azahinduka ibikorwa bifatika bigarura amahoro arambye mu burasirazuba bwa RDC.
Like This Post? Related Posts
