• U Rwanda na Senegal byasinyanye amasezerano y’ubufatanye mu guteza imbere ishoramari n’ubucuruzi hagati y’ibihugu byombi

U Rwanda na Senegal byasinyanye amasezerano y’ubufatanye mu guteza imbere ishoramari n’ubucuruzi hagati y’ibihugu byombi

U Rwanda na Senegal byasinyanye amasezerano y’ubufatanye agamije guteza imbere ishoramari n’ubucuruzi hagati y’ibihugu byombi hanashyirwaho Komisiyo ihuriweho igomba gukurikirana ubufatanye hagati y’ibihugu byombi mu nzego zitandukanye.

Ibi byabaye kuri uyu wa 7 Nzeri 2026, mu nama yahuje abashoramari n’abacuruzi bo mu Rwanda na Senegal yabereye i Kigali muri Marriot Hotel

Iyi nama yitabiriwe n’abashoramari bahagarariye abandi mu bihugu byombi bakora mu nzego zitandukanye zirimo ubwikorezi n’ibijyanye, ubwubatsi, abashara imari mu mpu n’imideli, ubuhinzi n’inganda zitunganya umusaruro n’izindi serivisi.

Aya masezerano yasinywe n’Umuyobozi Mukuru wungirije w’Urwego rw’Igihugu rw’Iterambere (RDB), Juliana Muganza, n’Umuyobozi Mukuru wungirije w’Ikigo cya Senegal gishinzwe Guteza Imbere Ishoramari n’Imishinga Minini (APIX), Moustapha Cissé.

Ni amasezerano azafasha ibihugu byombi gusangira ubumenyi, kungurana ubunararibonye no korohereza ishoramari, bityo habeho amahirwe mashya y’ubucuruzi n’imikoranire y’ibigo byo muri ibi bihugu.

Julianna Muganza yavuze ko ibi biganiro bigamije gushimangira umubano mu bya politiki no kurebera hamwe uko amahirwe y’ubufatanye mu bucuruzi n’ishoramari hagati y’u Rwanda na Sénégal yabyazwa umusaruro

Muri iyo nama kandi, Muganza yakiriye abashoramari n’abacuruzi b’Abanya-Senegali, agaragaza ko hari amahirwe menshi yo guteza imbere ubucuruzi n’ishoramari hagati y’ibihugu byombi.

Yagize ati “Izo nzego zifite amahirwe yo gutuma ibigo byo mu Rwanda na Senegal bikorana, bikagirana ubucuruzi ndetse bigashora imari ku masoko y’ibihugu byombi. Senegal ifite ubunararibonye mu kwihangira imirimo, ubucuruzi, serivisi n’inganda, aho umujyi wa Dakar ufatwa nk’irembo rikomeye ry’ubucuruzi muri Afurika y’Iburengerazuba.”

Muganza yavuze ko ubu bufatanye bushobora guhuza ubwo bushobozi bwa Senegal n’umwanya u Rwanda rufite rwo kuba igicumbi cy’ubucuruzi n’ishoramari muri Afurika y’Iburasirazuba.

Ubufatanye hagati ya RDB na APIX butegerejweho kongera amahirwe y’ibigo y’ishoramari mu bihugu byombi yo gushakisha amasoko mashya, kubona abafatanyabikorwa no kwagura ibikorwa by’ubucuruzi n’ishoramari.

 

Like This Post?

• Share On:

Related Posts

---