• Sri Lanka: Uwahoze ari umugore wa Perezida yatawe muri yombi akekwaho kunyereza inkunga

Shiranthi Rajapaksa, wahoze ari umugore wa Perezida wa Sri Lanka, Mahinda Rajapaksa, yatawe muri yombi n’inzego zishinzwe kurwanya ruswa nyuma yo gukekwaho gukoresha nabi amafaranga yari yatanzwe nk’inkunga ku muryango w’ubugiraneza yari ayoboye.

Shiranthi w’imyaka 73 yafashwe ku wa Gatatu tariki ya 7 Ukwakira 2026, nyuma yo kubazwa n’inzego zishinzwe iperereza ku byaha bya ruswa. Yagejejwe imbere y’urukiko rw’i Colombo, rutegeka ko afungwa mu gihe cy’icyumweru kugira ngo iperereza rikomeze.

Iperereza rishingiye ku mafaranga angana na miliyoni 10 z’amafaranga ya Sri Lanka, ahwanye n’amadolari ya Amerika arenga ibihumbi 30, yari yatanzwe n’ikigo cya Leta. Aya mafaranga yari agamije gufasha mu kugura imashini yifashishwa mu gusuzuma indwara, yari igenewe ibitaro by’abana i Colombo.

Abashinzwe iperereza bavuga ko amafaranga yatanzwe ku muryango wa Siriliya Saviya, wari uyobowe na Shiranthi Rajapaksa. Harimo kandi iperereza ku buryo ayo mafaranga yatanzwe n’ikigo cya Leta, aho uwari ukuriye banki icyo gihe na we yafashwe akekwaho kurenga ku mabwiriza mu itangwa ry’ayo mafaranga, ariko aza kurekurwa by’agateganyo n’urukiko.

Ku ruhande rwe, Shiranthi Rajapaksa ahakana ko yaba yarakoresheje nabi ayo mafaranga. Abamwunganira bavuga ko amafaranga akiri kuri konti y’umuryango Siriliya Saviya kandi ko nta ruswa cyangwa kunyereza amafaranga byabayeho.

Urubanza rwe ruje mu gihe inzego za Sri Lanka zongeye gukaza iperereza ku byaha bya ruswa bikekwa ku bantu bo mu muryango wa Rajapaksa, wari umaze imyaka myinshi ufite uruhare rukomeye muri politiki y’iki gihugu.

Umuhungu wa Shiranthi na Mahinda Rajapaksa, Namal Rajapaksa, na we ari mu maboko y’ubutabera mu rundi rubanza rujyanye n’ibirego bya ruswa. Umuryango wa Rajapaksa wagiye uhakana ibirego byinshi byagiye bishinjwa bamwe mu bawugize, uvuga ko bimwe muri byo bifite ishingiro rya politiki.

 

Like This Post?

• Share On:

Related Posts

---