• Polisi yataye muri yombi abacuruzi bafatanywe inzoga z’ibyuma mu mujyi wa Kigali

Polisi y’u Rwanda ikorera mu Mujyi wa Kigali ku bufatanye n’izindi nzego n’abaturage yafashe inzoga zitujuje ubuziranenge zizwi nk’ibyuma zakuwe ku isoko, zari zigifitwe n’abacuruza utubari n’ama ‘depot’ harimo uwasanganywe amakarito arenga 190, zose ziramenwa abafashwe barafungwa.

Byabaye nyuma yo guhabwa amakuru n’abaturage y’ahakiri izo nzoga zitemewe, aho Polisi mu bihe bitandukanye muri uku kwezi yafashe abazicuruza mu bice bitandukanye by’Umujyi wa Kigali.

Tariki 4 Ukwakira 2026, mu Karere ka Gasabo Polisi yasanze  mu rugo rw’uwitwa Mbonimpa Idrissa, amakarito y’inzoga z’ubwoko butandukanye bwakuwe ku isoko harimo za Konyagi, Kiwingu, Gilbey’s, Bazoka, Uruvange, Rak Gin n’izindi nyinshi.

Uyu mugabo usanzwe afite iduka ahazwi nko mu Gaharomani i Rusororo, ntiyahise aboneka kuko yahise atoroka ndetse Polisi  yatangaje ko iri kumushakisha mu gihe inzoga zo zafashwe zikamenwa.

Muri aka Karere n’ubundi mu Murenge wa Rusororo, tariki 10-11 Ukwakira 2026 hafashwe depot y’uwitwa Gatete Aimable wafatanywe amakarito 192 y’inzoga z’inkorano zirimo amakarito 35 ya Kiwingu n’izindi.

Polisi y’u Rwanda yatangaje ko izi nzoga zafashwe zamenwe, ariko nyirazo agishakishwa ngo akurikiranweho icyaha cyo gucuruza inzoga zitemewe mu Rwanda kuko zica abaturage.

Ni mu gihe i Nyarugenge mu Murenge wa Muhima ho hafashwe akabari kitwa Moon Life, kasanzwemo inzoga z’ibyuma zari zikirimo ziganjemo Konyagi, K Vant, Bazoka, Kiwingu n’izindi.

Polisi yagize iti “Hafashwe umuyobozi w’akabari witwa Uwitwa Tuyishime Claire, afungiye kuri Sitasiyo ya Polisi ya Muhima, naho inzoga zafashwe zamenywe.”

 

Polisi y’u Rwanda yashimye uburyo abaturage bakomeje gufasha inzego za Leta mu kurwanya inzoga zitujuje ubuziranenge, batanga amakuru ku gihe, abasaba gukomeza uwo muco.

Polisi yagize iti “Kuba inzoga z’ibyuma zigifatanwa abacuruzi ni ikimenyetso cyerekana ko zikiri mu baturage. Abaturage baributswa gukomeza gutanga amakuru ku bantu bazi ko bakizicuruza bihishe, kandi baributswa kwirinda kuzinywa kuko zangiza ubuzima bw’abaturage.”

 

 

Like This Post?

• Share On:

Related Posts

---