Yanditswe na: NSENGIYUMVA J Damascene
01/11/2026 21:19
Mu gace ka Sagada, mu majyaruguru ya Philippines, imva z’abantu zatwikijwe umuriro w’inkwi za pinusi, umwotsi mwinshi ukazamuka mu kirere, mu gihe imiryango yari yateraniye mu irimbi mu rwego rwo kwibuka ababo bitabye Imana.
Uyu muhango wabaye ku Cyumweru, tariki ya 1 Ugushyingo, ku munsi
wa All Saints’ Day, ukaba uzwi nka Panag-apoy, ijambo ryo mu rurimi
rw’Abakankanaey risobanura gucana umuriro.
Amashusho yafashwe muri iryo rimbi agaragaza imiryango icana inkwi
ku mva z’ababo, mu gihe umupadiri azenguruka aha imigisha imva akoresheje amazi
y’umugisha.
Cyril Dumogong, uyobora ba mukerarugendo muri ako gace, yasobanuye
ko uwo muco watangiye kera mbere y’uko buji ziboneka. Yavuze ko nubwo muri iki
gihe buji ziboneka, abaturage bakomeje uwo muhango nk’umuco gakondo.
Yongeyeho ko ku itariki ya 1 Ugushyingo imiryango imwe itegura
amafunguro gakondo arimo inkoko itegurwa mu buryo bwihariye izwi nka pinikpikan
n’umutsima wa suman, ndetse igategura guterana n’abashyitsi baba baje
kwifatanya na yo.
Ku bantu basura Sagada baturutse mu bindi bice bya Philippines,
uyu muhango utandukanye n’uko ahandi bibuka ababo bitabye Imana, aho akenshi
bakoresha buji n’indabo.
Diane de Guzman, wasuye ako gace aturutse muri Quezon City, yavuze
ko aho atuye bakoresha buji, ariko muri Sagada bakaba bacana inkwi ku mva. Undi
mushyitsi witwa Anthony Licerio, ukomoka muri Romblon, yavuze ko yashimishijwe
no kubona imiryango ihurira hamwe ikamarana igihe yibuka ababo.
Uyu muco wa Panag-apoy ufitanye isano n’imyemerere gakondo y’abaturage bo muri ako gace, aho bamwe bemera ko imyuka y’abakurambere igaruka gusura imiryango yabo muri iki gihe cy’umwaka.
