Arsenal yatsinze Manchester City nyuma y'imyaka 8

Amakipe yombi yagiye gukina adafite abakinnyi bayo ngenderwaho aho Arsenal yari mu rugo itarifite Bukayo Saka mu gihe Man City itarifite Rodri uheruka guhabwa ikarita y’umutuku ndetse na Kevin De Bruyne ufite imvune.

Uyu mukino watangiranye gukanira gukomeye hagati y'amakipe yombi byatumaga uburyo bw’ibitego butaba bwinshi.

Ikipe ya Manchester City ya Pepe Guadiola ni yo yinjiye mu mukino mbere itangira guhusha uburyo bukomeye ahanini bwaterwaga n’amakosa y’Umunyezamu David Raya washakaga gucenga ba rutahizamu bayo.

Igice cya Mbere cyarangiye amakipe yombi anganya ubusa ku busa

Arsenal yatangiranye Igice cya Kabiri impinduka, Leandro Trossard atanga umwanya kuri Gabriel Martinelli. Uyu Munya-Brésil yinjiye mu kibuga atangira gukora ikinyuranyo ari nako ahusha uburyo bwinshi bw’ibitego.

Umutoza wa Manchester City, Pep Guardiola na we yahise akora impinduka yongera imbaraga mu busatirizi. Rico Lewis yasimbuwe na John Stones, Mateo Kova?i? asimburwa na Matheus Nunes, mu gihe Julián Álvarez na we yahaye umwanya Jérémy Doku.

Ku munota wa 74, Doku yacenze neza ba myugariro ba Arsenal ahereza umupira Nunes ariko ateye ishoti umupira umunyezamu Raya awufata neza.

Umutoza wa Arsenal, Mikel Arteta, yakomeje gukora impinduka ndetse ukabona ko hari icyo zihinduye mu kibuga.

Ku munota wa 77, Martinelli yacenze neza Kylie Walker na Bernardo Silva acomekera umupira Ødegaard agerageje guteresha akaguru k’iburyo, umunyezamu Ederson afata neza umupira.

Man City wabonaga idakanganye cyane nk’uko isanzwe, cyane ko rutahizamu wayo Erling Haaland yari yibuze muri uyu mukino.

Ku rundi ruhande, ni ko Arsenal yakomezaga gusatira cyane. Kai Havertz yasunikiye umupira gahoro Gabriel Martinelli atera ishoti, myugariro Nathan Aké awukoraho uhindura icyerekezo uruhukira mu nshundura, Arsenal ibona igitego ku munota wa 86.

Umukino warangiye Arsenal yatsinze Manchester City igitego 1-0, iba intsinzi ya mbere ibonye kuri iyi kipe mu myaka umunani ishize, cyane ko yaherukaga kuyitsinda mu Ukuboza 2015.