• Imbamutima za Bruce Melodie nyuma yo guhura na Amb.Gen Nyamvumba Patrick

 

Umuhanzi nyarwanda uri mu bamaze kubaka izina mu Karere ka Afurika y’i Burasirazuba Bruce Melodie yatangaje ko yanyuzwe n’ibiganiro yagiranye na Ambasaderi w’u Rwanda muri Tanzania Amb.Gen.Patrick Nyamvumba.

Uwo muhanzi umaze iminsi muri Tanzania yagaragaje ko bimwe mu byo baganiriye harimo n’imishinga y’umuziki afitanye n’abahanzi batandukanye bo muri icyo gihugu hagamijwe guhuza imico y’Ibihugu byombi.

Yifashishije imbuga nkoranyambaga Bruce Melodie mu munezero yagaragaje ko yanyuzwe no guhura n’uwo muyobozi.

Yanditse ati:” Mu ruzinduko rwa njye muri Tanzania, kimwe mu byingenzi byabaye, kwari uguhura na Amb.Gen.Patrick Nyamvumba.”

Namusangije imishinga nteganya gukorana n’Abanya-Tanzania hamwe n’icyerekezo cyanjye cyo gukoresha umuziki mu guhuza Abanyarwanda n’Abanya Tanzania.”

Iby’uwo muhuro byashimangiwe n’itangazo rya Ambasade y’u Rwanda muri Tanzania ryashyizwe ku rubuga rwa rwayo rwa X kuri uyu wa Gatatu tariki ya 4 Gashyantare 2026.

Iti:” Umuco ni inkingi ikomeye ya dipolomasi. Twishimiye kwakira umuhanzi, Bruce Melodie, uri muri Tanzania mu mishinga ihuriweho n’akarere, harimo no kugirana ibiganiro na Ambasaderi General Patrick Nyamvumba, aho yagaragaje uko umuziki ugira uruhare mu guhuza abaturage bacu.”

Ni ibiganiro byabereye muri Tanzania byibanze ku mishinga y’akarere Bruce Melodie arimo, igamije guteza imbere umuziki nyarwanda no kuwuhuza n’amasoko yo mu Karere ka Afurika y’Iburasirazuba.

Ibi ni igisubizo ku bakunzi b’umuziki n’abawukora kuko bishimangira ko u Rwanda rubona umuco n’umuziki nk’imwe mu nzira z’ingenzi zo kubaka umubano mwiza hagati y’ibihugu, aho abahanzi bagira uruhare rukomeye mu guhuza abantu, hagamijwe gusangira indangagaciro no kumenyekanisha isura nziza y’igihugu.

Bruce Melodie yerekeye muri Tanzania tariki 28 Mutarama 2026, aherekejwe na Kenny Mugarura, uyobora sosiyete ya 1:55 AM Ltd izanzwe ifasha uwo muhanzi mu bikorwa by’iterambere.

 

Like This Post?

• Share On:

Related Posts

---