• Kamembe: Abana bafatiwe mu kabari banywa inzoga z’inkorano, nyir’akabari aratoroka

Ubugenzuzi bwakozwe n’ubuyobozi bw’Umurenge wa Kamembe bufatanyije n’inzego z’umutekano bwashyize ahagaragara uburangare bukomeye bw’abacuruza inzoga, nyuma yo gusanga abana babiri basibye ishuri bari kunywera mu kabari gacuruzwamo inzoga z’inkorano (zitujuje ubuziranenge).

Abo bana, umwe wiga mu mwaka wa kabiri w’amashuri yisumbuye undi mu wa gatanu w’amashuri abanza, bafatiwe mu kabari ko mu Kagari ka Kamashangi, hafi y’ishuri bigaho, mu masaha y’igitondo.

Ubugenzuzi bwari bugamije kurwanya inzoga zitujuje ubuziranenge, ariko butungura inzego zisanga muri ako kabari hari abana bari mu myambaro y’ishuri banywa inzoga.

Umwe mu bitabiriye ubugenzuzi yavuze ko basanzwe bafata abana basibye ishuri mu masoko, ariko kubona bari mu kabari banywa inzoga mu masaha y’amasomo ari ibintu biteye impungenge.

Ati: “Birababaje kubona umucuruzi atemera gusa kugurisha inzoga z’inkorano, ahubwo akemera no kuziha abana azi neza ko bakwiye kuba bari ku ishuri.”

Muri ako kabari hafatiwemo litiro 300 z’inzoga z’inkorano. Nyirako witwa Benimana Innocent w’imyaka 35 yahise atoroka, ubu aracyashakishwa n’inzego zibishinzwe.

Abo bana bahise baganirizwa, ababyeyi babo barabimenyeshwa, n’ubuyobozi bw’ishuri buramenyeshwa. Inzoga zafashwe zamenewe imbere y’abaturage, mu rwego rwo kubereka ubukana bw’icyo kibazo no kubakangurira gufatanya mu kukirwanya.

Umunyamabanga Nshingwabikorwa w’Umurenge wa Kamembe, Ingabire Joyeux, yibukije ko guha abana inzoga no kubatesha ishuri ari icyaha gihanwa n’amategeko.

Yasabye ba nyir’utubari kwirinda kwakira abana, kabone n’iyo baba bazanye amafaranga, ahubwo bakabagira inama yo gusubira ku ishuri no gutanga amakuru ku babyeyi cyangwa ubuyobozi.

Ubuyobozi kandi bwasabye abayobozi b’ibigo by’amashuri kujya bakurikirana buri munsi niba abana bose bitabira amasomo, mu gihe ababyeyi nabo basabwe gukaza ubugenzuzi ku myitwarire y’abana babo.

Iki kibazo cyongeye kugaragaza uko inzoga z’inkorano zikomeje kuba ikibazo cy’umutekano n’ubuzima rusange, cyane cyane iyo zigejejwe ku bana bato.

Like This Post?

• Share On:

Related Posts

---