• Imbamutima za Mani Martin wasuye Ingoro y’Amahoro i Hiroshima

Umuhanzi Maniraruta Martin wamamaye mu muziki nka Mani Martin yishimiye gusura Ingoro y’Amahoro iherereye i Hiroshima mu Buyapani, avuga ko yahigiye byinshi.

Abinyujije ku rukuta rwe rwa Instagram, ku mugoroba wo kuri uyu wa Mbere, tariki ya 2 Werurwe 2026, Mani Martin yasangije abamukurikira amafoto y’ibihe binyuranye yagize ubwo yasuraga iyi Ngoro, ndetse nyuma yaho  akaba yahaye ikiganiro abanyeshuri ba Kaminuza ya Hiroshima, Hiroshima City University.

Yagize ati “ Nishimiye gusura Ingoro y’Amahoro iherereye i Hiroshima mu Buyapani, ndi kumwe na mwarimu Yoshi wigisha mu ishami ryo kubungabunga amahoro no gukemura amakimbirane muri Kaminuza ya Hiroshima City University.

Ibi bihe bitazibagirana byampishuriye imbaraga z’umuntu ku giti cye mu kubungabunga amahoro ku Isi”

Uyu muhanzi yakomeje avuga ko nyuma yo gusura iyi Ngoro yakiranywe urugwiro muri Kaminuza ya Hiroshima City University ishami rya Chogoku, aho yabasangije byinshi ku rugendo rwe nk’umuhanzi.

Ingoro y’Amahoro iherereye i Hiroshima, Mani Martin yasuye niyo ibumbatiye amateka agaruka ku iraswa ry’igisasu kirimbuzi cyiswe “Little Man”, Leta Zunze Ubumwe za Amerika zarashe mu mujyi wa Hiroshima mu gitondo cya tariki 06 Kanama 1945 mu gihe cy’intamabara ya kabiri y’Isi.

Muri iyi Ngoro uhasanga imyambaro, amafoto, utwandiko ndetse n’ibindi bikoresho abahitanywe n’iki gisasu bari bafite, muri iyi Ngoro kandi uhabona ubuhamya bw’abarokotse iki gisasu ndetse n’ingaruka iki gisasu kirimbuzi cyasize.

Mani Martin urikubarizwa mu Buyapani kuva mu mpera z’icyumweru gishize, azataramira abakunzi be mu bitaramo bibiri ateganya kuhakorera ndetse agire umwanya wo kubumvisha album ye nshya yise “Rebirth” amaze iminsi ashyize hanze.

Biteganyijwe ko ku munsi w’Ejo, tariki ya 3 Werurwe 2026, Mani Martin azasura ishuri ry’abakobwa rya Hiroshima Jogakuin, ku Gicamunsi akazitabira ibiganiro bigaruka ku Mugabane wa Afurika bizabera muri Kaminuza ya Hiroshima City University, ni mu gihe ku Mugoroba azasusurutsa abazitabira ibyo biganiro.

 

Like This Post?

• Share On:

Related Posts

---