• Kim Jong Un yongeye gutorerwa kuyobora Koreya ya Ruguru

Umuyobozi w’ikirenga  wa Koreya ya Ruguru Kim Jong Un, yongeye gutorerwa kuba Umuyobozi  mukuru w’ishyaka rya Workers’ Party of Korea, bityo akomeza kuyobora iri shyaka ryonyine rifite ububasha muri guverinoma, rikaba ari manda ye ya 15 ku buyobozi bwaryo.

Itora ryabereye ku cyumweru, ku munsi wa kane w’inama y’ishyaka iba buri myaka itanu, nk’uko byatangajwe na Korean Central News Agency (KCNA). Muri iyi nama, kandi hafatwaga ibyemezo byo gutora abagize Komite Nkuru y’ishyaka, ndetse hanahindurwa amwe mu mategeko y’ishyaka, nubwo amakuru arambuye atatanzwe.

Kim Jong Un yabaye umuyobozi mukuru wa Koreya ya Ruguru nyuma y’urupfu rwa se, Kim Jong Il, mu 2011. Mu 2019, Inteko Nshingamategeko y’iki gihugu yemeje impinduka mu Itegeko Nshinga, zishyiraho ububasha bwa Kim bukomeye ku byemezo byose by’igihugu, bityo imugira umukuru w’igihugu ku buryo bwemewe n’amategeko.

Muri iyi nama y’ishyaka iri kubera muri 2026, Kim yasesenguye imirimo y’ishyaka mu myaka itanu ishize, anagaragaza intego n’ingamba nshya zigamije gukomeza iterambere mu myaka itanu iri imbere.

Mu ijambo rye ryo gufungura inama mu cyumweru gishize, Kim yavuze ko iyi myaka itanu ishize ari “igihe cy’ishimwe … mu gushyira mu bikorwa umugambi wacu wa sosiyalisime yihariye”, anemera ko hari ibibazo byugarije igihugu birimo ibihano by’amahanga n’“icyorezo cy’ubuzima rusange ku isi”.

Kim Jong Un yagaragaje ko: “Uyu munsi, Ishyaka ryacu rihanganye n’inshingano zikomeye kandi z’ihutirwa mu guteza imbere ibikorwa remezo by’ubukungu, kuzamura imibereho y’abaturage, no guhindura imirimo yose y’igihugu n’imibereho y’abaturage vuba bishoboka.”

Yongeyeho ko ibi bisaba kurwana urugamba rukomeye kandi ruhoraho nta na rimwe hagire icyo bihagarika cyangwa bigwa mu mwanya umwe.

Abandi bayobozi bakuru nabo bagiye bagira ibyo batangaza muri iyi nama, barimo Choe Son Hui, Minisitiri w’Ububanyi n’Amahanga wa Koreya ya Ruguru.

 

 

Like This Post?

• Share On:

Related Posts

---