• #Kwibuka32 : Ingabo za RDF n’Abanyarwanda baba muri Sudan y’Epfo bibutse Jenoside yakorewe Abatutsi 1994

Ingabo z'u Rwanda ziri mu butumwa bw' amahoro n'Abanyarwanda baba muri Sudani y’Epfo, bafatanyije n’abahagarariye Umuryango mpuzamahanga, bateraniye hamwe mu gikorwa cyo kwibuka ku nshuro ya 32 Jenoside yakorewe Abatutsi mu 1994.

Iki gikorwa cyabaye uyu munsi tariki ya 7 Mata 2026, kikaba cyari umwanya wo kwibuka abazize Jenoside no kuzirikana amasomo akomeye yasigiye Isi.

Mu murwa mukuru Juba, iki gikorwa cyabereye mu Kigo cya Loni cya Tomping gihuriza hamwe Ingabo z’u Rwanda ziri mu butumwa bw’amahoro bw’Umuryango w’Abibumbye muri Sudani y’Epfo (UNMISS), Abanyarwanda baba muri Sudani y'Epfo, abayobozi ba Loni, abahagarariye Guverinoma ya Sudani y’Epfo, ndetse n’imiryango mpuzamahanga ishamikiye kuri Loni.

Ibi byatanze urubuga rwo kwibuka hamwe no kongera gushimangira umuhigo wo guharanira ko Jenoside itazongera kubaho ukundi.

Mu ijambo rye, Ambasaderi Joseph Rutabana, uhagarariye u Rwanda muri Sudani y’Epfo, yasabye Umuryango Mpuzamahanga kongera imbaraga mu gukurikirana no guhana abakoze Jenoside yakorewe Abatutsi.

Yashimangiye akamaro k’ubutabera, anamagana abahakana Jenoside yakorewe Abatutsi, asaba Isi yose guharanira ko abayigizemo uruhare babiryozwa aho bari hose.

Ambasaderi Rutabana yanagarutse ku rugendo u Rwanda rumaze kugenda mu kwiyubaka hamwe n'ubwiyunge.

Yagaragaje ko nubwo igihugu cyanyuze mu mateka akomeye y’amacakubiri n’akababaro, Abanyarwanda bahisemo ubumwe n’ubunyarwanda aho gushyira imbere amoko.

Ingamba nko gukuraho indangamuntu zagaragazaga ubwoko no guteza imbere ubunyarwanda zagize uruhare rukomeye mu kongera kubaka igihugu.

Mu izina rya Guverinoma ya Sudani y’Epfo, Ambasaderi Jimmy Gama yagaragaje ko bifatanyije n’Abanyarwanda muri iki gihe cyo kwibuka.

Yavuze ko Jenoside yakorewe Abatutsi ari isomo rikomeye kuri Sudani y’Epfo, anashima uburyo u Rwanda rwabashije kwiyubaka rukava mu bihe bikomeye rukaba igihugu gifite ubumwe n’ubudaheranwa.

Ibikorwa nk’ibi byo kwibuka Jenoside yakorewe Abatutsi byabereye kandi no mu mujyi wa Malakal, muri Leta ya Upper Nile, aho Ingabo z’u Rwanda zirimo abasirikare n’abapolisi bifatanyije n’abayobozi b’inzego z’ibanze n’abaturage.

Iki gikorwa  cyagaragaje akamaro ko kwibuka Jenoside yakorewe Abatutsi no gushimangira ubumwe, aho abatanze ibiganiro bibukije abantu gukomeza kurwanya ingengabitekerezo y’urwango no guharanira indangagaciro rusange z’ubumuntu.

Muri ibyo bikorwa harimo urugendo rwo kwibuka, umunota wo kuzirikana abazize Jenoside yakorewe Abatutsi, gucana urumuri rw’icyizere, ubuhamya, ndetse n’indirimbo zo kwibuka.

Uyu muhango wasojwe no gukurikira ubutumwa bwatambukijwe bwa Perezida wa Repubulika y’u Rwanda Paul Kagame, bushimangira akamaro ko kwibuka, kwihangana no gufatanya twese mu gukumira ko Jenoside yazongera kubaho ukundi.

 

Like This Post?

• Share On:

Related Posts

---