• Amakuru / MU-RWANDA

Ku munsi nk’uyu w’italiki ya 12 Mata mu 1994, Leta y’abicanyi yari ikomeje umugambi wayo mubisha wo gutsemba Abatutsi hirya no hino mu gihugu. Iyi nyandiko iragaragaza hamwe mu hantu hashoboye kumenyekana hiciwe Abatutsi kuri iyi taliki mu 1994.

Taliki ya 12/4/1994, Karamira Froduald wa MDR-Power yavugiye kuri Radio Rwanda ko intambara ireba buri wese, ibi akaba yarabisubiyemo inshuro nyinshi mu byumweru byakurikiye. Yasabye abahutu kudasubiranamo ubwabo, ahubwo ko bagomba gufatanya n’ingabo mu kurangiza “akazi”. Ayo yari ambwiriza yarebaga cyane cyane abayoboke ba MDR-Power abasaba kwibagirwa amacakubiri yari hagati yabo na MRND na CDR, ahubwo bagafatanya nabo mu guhiga Abatutsi.

Uwo munsi, Radio Rwanda yasohoye itangazo riturutse muri minisiteri y’ingabo ryavugaga ko “nta macakabiri yari mu ngabo no mu Bahutu muri rusange.” Rikomeza rivuga ko abasirikari, abajandarume, n’Abanyarwanda bose bafashe icyemezo cyo kurwanya umwanzi wabo, kandi ngo bose baramuzi. Ngo “umwanzi aracyari wa wundi, umwe washatse kugarura ingoma ya Cyami, watsinzwe”. Iyo minisiteri yasabye abasirikari, abajandarume, abaturage gukorera hamwe, gukora amarondo no kurwanya umwanzi.

Uwo munsi guverinoma y’abicanyi yavuye i Kigali ijya gukorera i Gitarama, ihuza ibikorwa inashishikariza kurimbura Abatutsi muri perefegitura zose z’igihugu.

Muri Kigali, intumbi z’abishwe muri Jenoside zakusanyirizwaga mu makamyo, zikajya zijugunywa mu byobo byari byacukuwe n’ibimashini.

Taliki ya 12 Mata 1994 ingabo za MINUAR zamenyesheje Jenerali Romeo Dallaire ko Abatutsi bari barimo kwicwa muri Gisenyi na Kibungo. Ubwe yivugiye uwo munsi ko muri Kigali intumbi nyinshi zapakirwaga n’abanyururu mu bimodoka bisanzwe bikoreshwa ku mihanda, zikajugunywa mu bisimu byari byacukuwe na za kateripurari. Ibi bimodoka n’ibi bimashini byari ibya serivisi ya Minisiteri y’Imirimo ya Leta bitaga “ponts et chaussée” yayoborwaga na Ntirivamunda Alphonse, umukwe wa Perezida Habyarimana Juvenal. Ntirivamunda ubu yahungiye mu Bufaransa.

Umunyamabanga Mukuru wa Loni yavuze ko MINUAR igomba kuva mu Rwanda

Igihe Minisitiri w’Ububanyi n’Amahanga w’u Bubirigi W. Claes yari i Bonn mu Budage, yabwiye Boutros Boutros-Ghali ko “MINUAR ntacyo ikimaze mu Rwanda. […] ko MINUAR yari mu kaga. […] ko mu Rwanda Ababiligi bafitiwe urwango”. Yatanze igitekerezo ko MINUAR yavanwa mu Rwanda.

Boutros-Ghali amusubiza ko “na we ashyigikiye icyo gitekerezo”. Kugeza uwo munsi Umuryango w’Abibumye wari waranze kongerera ububasha MINUAR n’ubwo Dallaire atahwemye kubisaba. Igihe cya Jenoside, Boutros-Boutros Ghali yari mu ngendo i Burayi, arazikomeza atitaye ku ntabaza za MUNUAR zavugaga ko mu Rwanda abantu batagira ingano bishwe guhera taliki ya 7 Mata 1994.

Abatutsi barishwe i Nyawera na Mukarange muri Kayonza

I Nyawera, mu Murenge wa Mukarange, mu Karere ka Kayonza, mu mataliki ya 11-12 Mata 1994, habaye igikorwa cy’ubwicanyi burimo ubugome bukomeye. Interahamwe zishe umubyeyi witwaga Murebwayire wari utwite, zimubagisha umuhoro, zimukuramo uruhinja zihita zinamutwika n’uruhinja rwe. Kuri Paruwasi Gatolika ya Mukarange, taliki 07- 09/04/1994 Abatutsi bahahungiye ari benshi.

Ku wa 10-11 Mata 1994, batangiye kwicwa, birwanaho bakoresha amabuye n’amatafari ariko Interahamwe zunganirwa n’abajandarume n’abasirikare. Ku wa 12 Mata 1994, hazanywe urutonde rw’abagomba kwicwa, bategeka abatarapfa gusohoka mu kiriziya babizeza ko ntacyo bakibaye. Bageraga imbere ya paruwasi, Interahamwe zigahita zibatema. Padiri Mukuru Joseph Gatare, wanayoboraga Ishuri Ryisumbuye rya Mukarange yari Umututsi, yarishwe. Uwari umwungirije, Padiri Munyaneza Jean Bosco w’Umuhutu yaritambitse, yanga ko Abatutsi bari bamuhungiyeho bicwa, Interahamwe zihita zimwica.

 

Ubwicanyi bwahitanye Abatutsi benshi bari bahungiye mu Murenge wa Nyabitekeri, Nyamasheke

Mu Murenge wa Nyabitekeri ahaguye Abatutsi benshi ni ahahoze hubatse Segiteri ya Mukoma (Mariba).

Abatutsi baho bakaba barishwe ku wa 12 Mata 1994 babakuye mu ngo iwabo babatumiye mu nama yiswe iy’umutekano yari itumiwemo abagabo bose. Abagabo barahagurutse mu gitondo nka saa mbiri basaba abagore n’abana ko baba bagiye ku rusengero rw’Abadiventiste b’Umunsi wa Karindwi. Aho ni ho guhera taliki ya 10 Mata 1994 buri joro imiryango yose yahuriraga kugira ngo icungirwe umutekano. Abagabo bakarara bicaye bareba ko hari igitero cyaza bagahangana na cyo. Bageze aho bari batumiwe mu nama basanze nta nama ihari ahubwo hari Interahamwe zifite intwaro gakondo ziteguye kubica.

Konseye witwaga Kanyarurembo Joseph yahise abasaba kujya mu nzu ya Segiteri yari ishaje babafungiranamo, hanyuma bamenamo essence yanga kwaka. Konseye Kanyarurembo yasabye uwitwa Torero Theodore wabaye umusirikari gufata gerenade agateramo. Yateyemo gerenade ebyiri, ushatse gusohoka bakamwica.

Uwo munsi Abatutsi batagira ingano biciwe kwa Karemera Claver, i Mukoma muri Nyabitekeri, Nyamasheke. Aho mu rugo rwa Karemera ni mu Murenge wa Nyabitekeri mu Karere ka Nyamasheke ahahoze ari muri Serire Mukoma. Muri urwo rugo hahungiye Abatutsi benshi, bishwe n’igitero cya PIMA ku wa 12 Mata 1994 gihita gikomeza kijya kwica ku Badivantisite.

Ni ku muhanda munini uva ahitwa ku Kinini ugana ku kigo cy’amashuri abanza ya Ngoma mu Murenge wa Bushekeri, Akarere ka Nyamasheke. Muri Jenoside yose hari bariyeri n’ikirombe kirekire gifite hejuru ya metero 15. Abatutsi bo muri iyi Segiteri, ubu ni mu Kagari ka Nyarusange, bose barakusanywaga bakajyanwa kwicirwa ku Mugina nyuma y’uko Perefe Bagambiki Emmanuel azengurutse Cyangugu asaba Abahutu gutangira kwica. Kuva taliki 12/04/1994 kugeza taliki 18/04/1994 ni bwo bishwe.

Abatutsi bahiciwe ni abo muri Segiteri ya Ngoma cyane cyane muri Selire ya Keshero kuko ari yo yari ituwe n’Abatutsi benshi. Baragoswe barabazamura ugeze kuri bariyeri wese yahitaga yicwa. Interahamwe zabishe zarimo abitwa Mazera, Ndayishimiye Emmanuel, Bazambanza n’abandi. Abatutsi bishwe urw’agashinyaguro kuko abagabo benshi babanje kubakata ubugabo, kubatema amaboko, ndetse bamwe muri bo babanje kubakuramo amaso, abagore bakabanza kubasambanya, abana b’impinja babamburaga ba nyina bakabajugunya muri cya kirombe ari bazima, ku buryo amanywa n’ijoro habaga ari imiborogo n’amarira y’abana bajugunywaga muri cya cyobo ari bazima.

Burugumesitiri Furere Abel yarimbuye Abatutsi bo muri Komini ya Rwamatamu, Umurenge wa Gihombo, Kibuye

Mu 1994, Komini Rwamatamu yayoborwaga na Burugumesitiri FURERE Abel. Ku wa 12/04/1994 habaye inama kuri Komini yatangiye nka saa yine z’amanywa isozwa nka saa saba n’iminota 20. Yari yitabiriwe na ba Konseye, Abakozi ba Komine ariko b’Abahutu, abacuruzi bari bakomeye b’Abahutu, ndetse n’Interahamwe. Irangiye ni bwo ba Konseye baciye mu mpunzi bababwira ko amahoro yagarutse Abatutsi bakisubirira mu ngo zabo. Ariko nyuma yaho gato Abatutsi bari bahungiye kuri Paruwasi ya Kibingo batangiye kwicwa ndetse hari n’imodoka yuzuye Abasirikare yaje irimo n’Interahamwe, zahise ziza kuri Komini zari ziyobowe na Ruzindana Obed wari umucuruzi ukomeye ku Mugonero wabanje guca urutsinga rwa Telefone yabaga kuri Komine ya Rwamatamu ngo Abatutsi batabasha gutabaza bene wabo bakabatabara cyangwa bakabibwira abanyamahanga bikamenyekana. Ni bwo hatangiye kumvikana amasasu menshi.

Kuri uyu wa 12/04/1994, hishwe abana benshi ndetse n’abagore bari bahungiye mu rusengero barakomeza baza no kuri Komine. Uwo munsi hishwe Abatutsi barenga 250.

Ruzindana Obed yahamwe n’icyaha cya Jenoside akatirwa igifungo cy’imyaka 25.

Abatutsi barishwe mu Buharabuge, Rugarika mu Karere ka Kamonyi

Biharabuge, mu Mudugudu wa Kigarama, Akagari ka Sheri, Umurenge wa Rugarika, Akarere ka Kamonyi, hiciwe Abatutsi bari bahatuye n’abari bahahungiye guhera taliki 07 Mata 1994 baturutse i Kigese bahungiye mu miryango no mu nshuti zabo i Sheri. Habaye inama kuri Komini Runda ikoreshejwe na Burugumesitiri Ndayambaje Sixbert, yatumiyemo ba Resiponsabure bose ba selire na ba Konseye abategeka kumenyesha Abatutsi ko ari bo bahigwa, no kubwira Abahutu ko batagomba kongera gufasha Abatutsi

Abatutsi bakusanyirijwe muri Centre ya Biharabuge, Interahamwe zigenda zicamo abo zishaka. Interahamwe zarabashoreye zibakikije ngo hatagira uwiruka, uwo bashatse gutema bagatema, abo bafata ku ngufu, n’ibindi. Izo nterahamwe zunganiwe n’izivuye mu Gatsata zari zifite bariyeri mu Rwabashyashya zayoborwaga na Sharangabo w’ i Rugarika wari ufite imodoka yatwaraga Interahamwe aho zajyaga kwica. Barabatwaye babageza mu Biharabuge, babicaza mu ishyamba bitaga Cyingumba, barabaryamisha, batangira kubakubita impiri, imihoro, amasuka n’ibindi. Bari Abatutsi babarirwa mu 1,000.

Ubwicanyi bwatangiye ahagana saa saba kugeza nka saa moya z’ijoro. Nyuma yo kwica bacuje imirambo, mu gitondo haje imodoka ipakira imirambo ndetse n’abatari bapfuye neza bayijyana kuyijugunya mu cyuzi bashoragamo inka cyitwa Cyabariza. Ubwicanyi bwabereye muri Komini Runda bwagizwemo uruhare cyane na Burugumesitiri Ndayambaje Sixbert, Burugumesitiri wungirije Habyarimana Vivien, umwarimu Uwimana Pelagie, Joseph Setiba n’izindi Nterahamwe.

Ijugunywa ry’Abatutsi ba Runda muri Nyabarongo

Utugari dukora kuri Nyabarongo mu Karere ka Kamonyi, twari dufite site nyinshi zanyurwagamo n’Interahamwe n’abaturage bajya kujugunya Abatutsi muri Nyabarongo. Hari site izwi cyane y’ahitwa mu Ruramba. Kuroha Abatutsi muri Nyabarongo byakozwe cyane kuva taliki ya 12 Mata 1994 kugeza mu mpera za Kamena 1994. Taliki 12 Mata 1994 Abatutsi bari bahungiye ku Kigo Nderabuzima cya Kigese barabashoreye babajyana kubaroha muri Nyabarongo.

Uwo munsi ni ho Abatutsi bashorewe ari benshi ariko na nyuma yaho byarakomeje. Uko bavumbuye Abatutsi bakabashorera bakabajyana kuri Nyabarongo, ndetse bakabakoresha urugendo rurerure rugera nko ku masaha atatu, bagenda bakubitwa kandi bashorewe n’imbaga y’abantu bagenda bavugirizwa n’induru. Bamwe muri bo barababohaga bakabaroha muri Nyabarongo ari bazima, bakabatereramo n’amabuye, abandi bakabatema bagatabwa muri Nyabarongo.

Iyicwa ry’Abatutsi bo mu Kabuga, Umurenge wa Bumbogo, Gasabo

Kuva taliki 10-11 Mata 1994, Abatutsi batuye mu bice bitandukanye bo mu Murenge wa Bumbogo bahungiye ahitwa mu Kabuga ka Nyabikenke, ahahoze ibiro bya Segiteri Karama hiciwe Abatutsi benshi bagera ku bihumbi bine magana atanu (4500). Abahiciwe ni abari baturutse ahantu hatandukanye nka Bumbogo, Kanombe, Musave, Kimironko na Ndera bahahungiye kuko bari bababwiye ko abaho babahaye ubuhungiro kuri Segiteri Karama.

Bigeze ku wa 12 Mata 1994, haza abaturutse i Gishaka n’abandi ba Nkuzuzu; bigeze nijoro umujandarume witwaga Emmanuel azana za gerenade azihetse kuri moto, haza n’imodoka y’uwitwaga Tadeyo wari Interahamwe kabuhariwe izanye imihoro bari bamaze kwicisha abari bahungiye mu kiriziya i Gishaka ayizanamo Interahamwe z’impunzi zari zaravuye i Kivuye muri Byumba hamwe n’abitwaga abakonya bari baravuye Ruhengeri batuye i Rubungo n’izivuka Bumbogo zarimo abitwa Mutaganira, Muyoboke Augustin, Karangwa Theophile na Rwabutogo. Ni bo bishe abo Batutsi guhera ku mugoroba wo ku wa 12 bageza mugitondo cyo ku wa 13 Mata babarangije.

Iyicwa ry’Abatutsi i Musenyi mu Bugesera na Muhura muri Gatsibo

I Musenyi mu Bugesera, Perezida Habyarimana akimara gupfa, Abatutsi batangiye gusenyerwa. Uwari resiponsabure wa selire Kagusa witwaga Karangwa yabwiye Abatutsi ko Umututsi utari buhungire iwe bakamwica ntawe umumubaza. Mu rugo rwe haje Abatutsi barenga 500. Karangwa yapanze gahunda y’uko bagomba kwica Abatutsi bari bahungiye iwe, atumaho igitero kirabica.

Abatutsi bake bari basigaye i Kagusa batangiye guhungira i Nyamata ariko abenshi bicirwa mu nzira batahageze. Ubu, muri uru rugo rwa Karangwa hashyizwe ikimenyetso cya Jenoside. Mu murenge wa Remera, Akagari ka Rwarenga ahari muri Komine Muhura yayoborwaga n’uwitwa Ndayishimiye, kuva ku wa 07/04/1994 kugera kuwa 12/04/1994 hiciwe Abatutsi bamenyekanye 252 bakaba bashyinguye mu rwibutso ruhari.

Jenoside yakorewe Abatutsi yarateguwe ishyirwa mu bikorwa na Leta. Kubona guhera taliki ya 7 Mata 1994 mu gitondo, Abatutsi bicwa icyarimwe ahantu hantandukanye mu gihugu hose byerekana ku buryo budashidikanywaho ko ari umugambi wari warateguwe na Leta.

Like This Post? Related Posts
Andika igitekerezo
Recent Comments