• Perezida Kagame yitabiriye Inama ya mbere nyafurika y’ iterambere ry’ubwikorezi bwo mu kirere muri Togo

Perezida wa Repubulika y’u Rwanda, Paul Kagame, yageze mu mujyi wa Lomé, umurwa mukuru wa Togo, aho yakiriwe na Perezida wa Togo, Faure Essozimna Gnassingbé, mbere y’itangira ry’Inama ya mbere ya Afurika igamije guteza imbere urwego rw’ubwikorezi bwo mu kirere, izwi nka African Air Transport Convention & Expo.

Uku kwakirwa ku rwego rwo hejuru kugaragaza umubano mwiza usanzwe hagati y’ibihugu byombi ndetse n’uruhare rukomeje kwiyongera rw’u Rwanda mu biganiro n’ikorwa rya gahunda zigamije kwihutisha iterambere ry’umugabane wa Afurika.

African Air Transport Convention & Expo ni inama ihuje abakuru b’ibihugu, abayobozi b’ibigo by’indege, abashoramari, impuguke mu by’indege n’abafatanyabikorwa bo hirya no hino ku mugabane wa Afurika no ku isi.

Iyi nama igamije kurebera hamwe uburyo bwo kongera imikoranire hagati y’ibihugu bya Afurika mu rwego rw’ubwikorezi bwo mu kirere, gukuraho inzitizi zikibangamira urujya n’uruza rw’abantu n’ibicuruzwa, ndetse no gushaka ibisubizo byafasha uyu mugabane kugira urwego rw’ubwikorezi bugezweho kandi ruhendutse.

Abateguye iyi nama bavuga ko Afurika ifite amahirwe menshi yo guteza imbere ubwikorezi bwo mu kirere, ariko ko hakiri ibibazo birimo ibiciro biri hejuru by’amatike, amategeko atandukanye hagati y’ibihugu ndetse n’ibikorwa remezo bikiri hasi ugereranyije n’ahandi ku isi.

Mu myaka yashize, u Rwanda rwabaye kimwe mu bihugu byagaragaje ubushake bwo guteza imbere urwego rw’ubwikorezi bwo mu kirere. Sosiyete y’indege y’u Rwanda, Rwandair  yakomeje kwagura ibikorwa byayo, ifungura inzira nshya zihuza Afurika n’indi migabane.

Uretse ibyo, u Rwanda rwakomeje gushora imari mu bikorwa remezo by’indege, harimo kwagura serivisi z’Ikibuga Mpuzamahanga cy’Indege cya Kigali no guteza imbere imishinga mishya igamije kongera ubushobozi bw’uru rwego.

Perezida Kagame yakunze kugaragaza ko ubwikorezi bwo mu kirere ari imwe mu nkingi z’iterambere ry’ubukungu bwa Afurika, kuko bworoshya ubucuruzi, ubukerarugendo n’ishoramari.

Urugendo rwa Perezida Kagame muri Togo ruje mu gihe umubano hagati y’ibihugu byombi ukomeje gutera imbere. Mu myaka ishize, Kigali na Lomé byagiye bigaragaza ubushake bwo gukorana mu nzego zitandukanye zirimo ubukungu, ikoranabuhanga, umutekano n’imiyoborere.

Perezida Faure Gnassingbé na Perezida Kagame basanzwe bafitanye umubano wa hafi ushingiye ku bufatanye mu guteza imbere Afurika. Bombi bakunze guhura mu nama zitandukanye z’umugabane no kungurana ibitekerezo ku bibazo birebana n’iterambere ry’ibihugu bya Afurika.

Impuguke mu by’ubukungu zigaragaza ko ubwikorezi bwo mu kirere bushobora kugira uruhare runini mu kuzamura ubukungu bwa Afurika. Kugeza ubu, ibihugu byinshi bya Afurika biracyagorwa no kugira ingendo z’indege zihendutse kandi zihuza imijyi myinshi yo ku mugabane.

Ibi bituma ubucuruzi n’urujya n’uruza rw’abantu bikomeza guhura n’imbogamizi. Ni yo mpamvu gahunda nk’Isoko Rusange rya Afurika (AfCFTA) zikeneye gushyigikirwa n’urwego rw’ubwikorezi rukomeye kugira ngo intego zazo zigerweho.

Abitabiriye iyi nama bazaganira ku ngingo zitandukanye zirimo kongera ubufatanye hagati y’ibihugu, gukurura abashoramari mu rwego rw’indege, guteza imbere ikoranabuhanga rikoreshwa mu bwikorezi bwo mu kirere no kongera umutekano mu ndege.

Biteganyijwe ko Perezida Kagame azagira uruhare mu biganiro bikomeye bizabera muri iyi nama, aho azasangiza abandi bayobozi ubunararibonye bw’u Rwanda mu guteza imbere ubwikorezi bwo mu kirere no gukoresha uru rwego nk’imbarutso y’iterambere ry’ubukungu.

Urugendo rwa Perezida Kagame muri Togo rugaragaza kandi ubushake bw’u Rwanda bwo gukomeza kugira uruhare rugaragara mu bikorwa bigamije guhuza Afurika, guteza imbere ubucuruzi n’ishoramari, no gushyigikira gahunda zifasha umugabane kwigira no guhangana ku rwego mpuzamahanga.

 

Like This Post?

• Share On:

Related Posts

---