Yanditswe na: NSANZABERA Jean Paul
19/06/2026 15:45
Minisitiri
w’Uburezi, Nsengimana Joseph, yatanze impamyabumenyi z’Icyiciro cya mbere cya
Kaminuza n’iz’Icyiciro cya gatatu cya Kaminuza ku bapolisi 38 barimo
Abanyarwanda 23 na 15 baturutse mu bihugu by’amahanga barangije amasomo mu
Ishuri Rikuru rya Polisi y’u Rwanda.
Uyu muhango
wo gusoza Icyiciro cya 14 cy’amasomo y’ubuyobozi muri Polisi y’u Rwanda
wabereye mu karere ka Musanze, kuri uyu wa Gatanu, tariki 19 Kamena 2026.
Abasoje aya
masomo yari amaze umwaka umwe, ni abanyeshuri 38 bo ku rwego rwa ba Ofisiye
Bakuru baturutse mu bihugu 10 byo muri Afurika. Barimo Abanyarwanda 23 bo muri
Polisi y’u Rwanda, RNP, Urwego rw’Igihugu rw’Ubugenzacyaha, RIB, Urwego rw’u
Rwanda rushinzwe Igorora, RCS, n’Urwego rw’Igihugu rushinzwe Iperereza, NISS.
Umuyobozi
mukuru w’ishuri rikuru rya Polisi y’u Rwanda, CP Christophe Bizimana yashimiye
aba bapolisi 38 basoje amasomo yabo barimo, 36 basoje icyiciro cya gatatu cya
Kaminuza n’abandi babiri basoje mu cyiciro cya mbere cya Kaminuza.
Mubyo
yabashimiye harimo umuhate, umurava n’ubunyamwuga bagaragaje mu gihe
cy’amasomo, abasaba ko bazakomerezaho no mu nshingano zabo za buri munsi.
Ati “Icya
mbere, nimusubira mu kazi kanyu, mujye mwibuka ko mufite inshingano zo gukora
akazi kanyu neza kurushaho kandi mu buryo bwa kinyamwuga.
Ubumenyi
n’ubushobozi mwungukiye hano bigomba kugaragarira mu myitwarire no mu bikorwa
byanyu bya buri munsi. Mugomba kandi kugira uruhare mu mpinduka nziza aho
mukorera no mu muryango mugari. Niyo impinduka yaba nto, iba ifite agaciro”.
Yakomeje
avuga ko icya kabiri ari ugukomeza “Kubungabunga umubano mwubatse muri iri
shuri kuko uwo mubano uzabafasha gukomeza ubufatanye hagati y’inzego n’ibihugu
muturukamo. Mu bihe by’ibibazo by’umutekano biriho ubu, ubufatanye hagati
y’inzego n’ibihugu ni ingenzi cyane.”
CP Bizimana
yasoje ashimanira ko ikinyabupfura ari ryo zingiro ryo gukora neza inshingano
zo kurinda umutekano.
Ati
“Mukomeze kurangwa n’imyitwarire myiza n’ikinyabupfura. Mu mwuga wacu,
imyitwarire ni yo shingiro rya byose. Ariko kandi ntibigarukira ku kazi gusa;
harimo no kwitwara neza mu buzima bwa buri munsi”.
Yababwiye ko
imyitwarire myiza igaragarira mu buryo bakoresha igihe mu buzima bwabo.
Ati “Uko
mukora imyitozo ngororamubiri, uko murinda ubuzima bwo mu mutwe, ibyo muvuga,
abo mubibwira, aho mubivugira ndetse n’uburyo mwubaha buri muntu muhura na we
ni byo byingenzi”.
Yasoje
abasaba gukomeza kurangwa n’imyitwarire myiza mu kazi no mu buzima bwabo
abifuriza amahirwe masa mu nshingano barimo mu bihugu byabo.
