Yanditswe na: NSANZABERA Jean Paul
07/07/2026 08:28
Umugaba Mukuru w’Ingabo za Uganda (UPDF) Gen Muhoozi Kainerugaba yagiranye ibiganiro byo ku rwego rwo hejuru n’intumwa z’ikigo cy’Abashinwa Aerospace Long March International Co mu mujyi wa Fort Portal
Ibi biganiro byibanze ku gushimangira ubufatanye hagati ya Uganda n’u Bushinwa mu rwego rw’umutekano n’igisirikare, harimo no guteza imbere ikoranabuhanga rya gisirikare, guhererekanya ubumenyi n’ubushobozi, ndetse no kongerera imbaraga ubushobozi bw’ingabo za Uganda.
Mu nama yahuje impande zombi, baganiriye ku buryo bwo kongera ubufatanye mu bijyanye no guhererekanya ikoranabuhanga, guhugura abasirikare no guteza imbere ubushobozi bwa gisirikare bujyanye n’ibihe.
Abitabiriye ibiganiro bagaragaje ko gukoresha ikoranabuhanga rigezweho ari ingenzi mu guhangana n’ibibazo by’umutekano no kurushaho kunoza imikorere y’ingabo.
Ubufatanye hagati ya Uganda n’u Bushinwa bumaze imyaka myinshi, cyane cyane mu nzego zirimo ibikorwa remezo, ubukungu n’umutekano.
Ibiganiro byabereye i Fort Portal byagaragaje ubushake bw’impande zombi bwo gukomeza kwagura uwo mubano no gushakira hamwe ibisubizo ku bibazo by’umutekano bihangayikishije akarere.
Gen. Muhoozi Kainerugaba yavuze ko gukorana n’abafatanyabikorwa mpuzamahanga bifasha Ingabo za Uganda (UPDF) kongera ubushobozi no gukomeza kubaka igisirikare gifite ubumenyi n’ikoranabuhanga rigezweho.
Ku ruhande rw’intumwa za ALIT, zagaragaje ubushake bwo gukomeza gukorana na Uganda mu mishinga itandukanye ijyanye n’ikoranabuhanga n’ibikoresho bya gisirikare.
Ibi biganiro biri mu murongo w’ingamba za Uganda zo gukomeza kuvugurura no kongerera ubushobozi ingabo zayo binyuze mu bufatanye n’ibihugu n’ibigo mpuzamahanga.
