• Burkina Faso n’u Bufaransa byongeye kwirukana abadipolomate hagati yabyo

Kuva mu cyumweru gishize, nta badipolomate b’Abafaransa basigaye muri Burkina Faso, mu gihe abadipolomate ba Burkina Faso bari mu Bufaransa bari bahawe kugeza ku wa Mbere nimugoroba kugira ngo babe bamaze kuva ku butaka bw’u Bufaransa.

Ibi bigaragaza indi ntambwe mu ihungabana rikomeje kuranga umubano hagati ya Paris na Ouagadougou, nyuma y’itangazo ryasohowe ku wa 26 Kamena 2026 ryemeza ko ubutegetsi bwa Burkina Faso bwahagaritse umubano wa dipolomasi n’u Bufaransa.

Kwirukanwa kw’abadipolomate ba Burkina Faso bari mu Bufaransa n’abadipolomate b’Abafaransa bari muri Burkina Faso byari byitezwe, bikurikira gahunda yatangijwe na Ouagadougou, nk’uko RFI yabitangaje.

Ku wa 26 Kamena, ubutegetsi bwa Capt. Ibrahim Traoré bwatangaje ko buhagaritse umubano wa dipolomasi n’u Bufaransa, bushinja Paris “gukomeza kubangamira inyungu za Burkina Faso” ndetse no gushyigikira imitwe y’inyeshyamba.

Nyuma y’iri tangazo, Ambasaderi wa Burkina Faso i Paris yahamagajwe na Minisiteri y’Ububanyi n’Amahanga y’u Bufaransa (Quai d’Orsay), imumenyesha ko mu rwego rwo gusubiza, abakozi bose ba Ambasade ya Burkina Faso bagomba kuva mu Bufaransa mu gihe cy’iminsi irindwi.

Abayobozi ba Ouagadougou bashinja u Bufaransa gushyigikira imitwe y’iterabwoba, ibirego Paris yamaganiye kure ivuga ko ari “ibinyoma bidafite ishingiro.”

Mu itangazo ryayo, Quai d’Orsay yavuze ko u Bufaransa bwamagana ibikorwa byose by’iterabwoba kandi bugakomeza gushyigikira abaturage ba Burkina Faso, ari bo bavuga ko ari “abahohoterwa ba mbere” n’ikibazo cy’umutekano muke kiri muri icyo gihugu.

Uku guhagarika umubano kuje nyuma y’ikurwa ry’ingabo z’u Bufaransa muri Burkina Faso, ihamagazwa ry’Ambasaderi w’u Bufaransa i Ouagadougou, ndetse n’ingamba z’ubutegetsi bwa Burkina Faso zo gushaka abafatanyabikorwa bashya, cyane cyane Uburusiya.

 

Like This Post?

• Share On:

Related Posts

---