• Ariel wayz niwe muhanzi nyarwanda uhatanye mu bihembo bya AFRIMMA 2026

Umuhanzikazi Ariel Wayz yongeye kwandika amateka mu muziki nyarwanda nyuma yo gutangazwa nk'umuhanzi rukumbi uhagarariye u Rwanda mu bihembo bya African Muzik Magazine Awards (AFRIMMA) 2026, bimwe mu bihembo bikomeye bihabwa abahanzi b'umuziki ku mugabane wa Afurika.

Ariel Wayz yagaragaye ku rutonde rw'abahataniye igihembo mu cyiciro cya Best Female East Africa, aho azahangana n'abahanzi b'ibyamamare bo mu karere ka Afurika y'Iburasirazuba barimo Zuchu na Abigail Chams bo muri Tanzania, Winnie Nwagi wo muri Uganda, Nikita Kering na Njerae bo muri Kenya, ndetse na Salemia na Veronica Adane bo muri Ethiopia. Abategura AFRIMMA batangaje ko itora ry'abafana ryamaze gutangira binyuze ku rubuga rwabo rwemewe.

Kuba Ariel Wayz ari we wenyine uhagarariye u Rwanda muri aya marushanwa bifatwa nk'ikimenyetso cy'uko umuziki nyarwanda ukomeje kugera ku rwego mpuzamahanga. Mu myaka ishize, u Rwanda rwagiye rugira abahanzi bagaragaye muri AFRIMMA, barimo Knowless Butera, Bruce Melodie n'abandi, ariko uyu mwaka Ariel Wayz ni we wonyine wabashije kubona umwanya ku rutonde rw'abahatana.

Ariel Wayz amaze imyaka mike agaragaza impano idasanzwe mu njyana ya R&B na Afro-pop. Indirimbo ze zirimo Away, Good Luck, You Should Know n'izindi zamufashije kwagura umubare w'abamukurikira haba mu Rwanda no hanze yarwo. Yanagiye agaragara mu bitaramo n'ibikorwa bikomeye by'umuziki ku rwego rw'akarere, ibintu byatumye izina rye rirushaho kumenyekana.

Abasesenguzi b'umuziki bavuga ko iri hatana rizaba rikomeye cyane kuko icyiciro cya Best Female East Africa kirimo bamwe mu bahanzikazi bafite izina rikomeye muri Afurika y'Iburasirazuba. Gusa kuba Ariel Wayz yarabashije kugera ku rutonde rw'abahatanira iki gihembo ubwabyo ni intambwe ikomeye ku muziki nyarwanda no ku rubyiruko rukomeje guhanga ibihangano bifite ireme.

Abafana b'umuziki nyarwanda basabwe gushyigikira Ariel Wayz binyuze mu matora ategurwa na AFRIMMA, kuko amajwi yabo azagira uruhare rukomeye mu kugena uzegukana igihembo. Abategura ibi bihembo batangaje ko ibirori byo gutangaza abatsinze biteganyijwe kubera i Dallas, muri Leta ya Texas muri Leta Zunze Ubumwe za Amerika, aho hazahurira abahanzi bakomeye baturutse hirya no hino ku mugabane wa Afurika.

Naramuka yegukanye iki gihembo, Ariel Wayz azaba yanditse amateka mashya mu muziki nyarwanda ndetse akomeza gushyira u Rwanda ku ikarita y'umuziki wa Afurika.

 

Like This Post?

• Share On:

Related Posts

---