Yanditswe na: NSENGIYUMVA J Damascene
07/08/2026 14:53
Minisiteri y'Umutekano w'Imbere muri Serbia yohereje kajugujugu zifasha kuzimya inkongi y'umuriro ikomeje kwibasira ahantu nyaburanga ha Deliblatska Pescara mu Ntara ya Vojvodina, mu majyaruguru y'uburasirazuba bw'igihugu.
Amashusho yafashwe ku wa Gatatu agaragaza kajugujugu zisuka amazi ku muriro, mu gihe umwotsi mwinshi wazamukaga mu kirere, ibimera byinshi bikaba byari bimaze gushya.
Abayobozi batangaje ko iyi nkongi yadutse nko muri kilometero imwe uvuye aho indi nkongi nini yazimijwe ku wa 22 Nyakanga. Kugeza ubwo iyi nkuru yatangazwaga, umuriro wari umaze kwibasira ubuso burenga hegitari 300 kandi wari ugikomeza gukwirakwira.
Umuyobozi w'Urwego rushinzwe ibihe by'amage, Luka Causic, yavuze ko abashinzwe kuzimya inkongi barenga 80, abafatanyabikorwa b'abakorerabushake ndetse na kajugujugu nyinshi boherejwe kugira ngo bahoshe uwo muriro.
Yanaburiye abaturage ko ubushyuhe bukabije buri kwiyongera buteza ibyago byinshi by'inkongi, abasaba kwirinda gucana umuriro ahantu hafunguye. Ibi yabivuze nyuma y'uko umugabo umwe apfuye hafi y'umujyi wa Pozarevac mu nkongi bivugwa ko ari we wari wayiteje.
Agace ka Deliblatska Pescara, gakunze kwitwa ubutayu bunini bw'umusenyi buri ku mugabane w'u Burayi, ni kamwe mu hantu harinzwe cyane muri Serbia kubera ko kabamo amoko menshi y'ibimera n'inyamaswa zidasanzwe.
Iyi nkongi ije mu gihe Serbia ihanganye n'ibihe bikomeye by'inkongi z'umuriro bitewe n'ubushyuhe bukabije n'amapfa amaze igihe, ibintu byatumye ubuyobozi bwongera ingamba zo guhangana n'ibiza.
Iki kibazo kiri no kugaragara mu bindi bihugu byo mu Burayi bwo Hagati n'ubwo mu Majyepfo, aho ubushyuhe bukabije n'amapfa byateje inkongi nyinshi. Amapfa yanagabanyije cyane amazi y'Uruzi rwa Danube, bihungabanya ubwikorezi bwo mu mazi n'ikorwa ry'amashanyarazi akomoka ku ngomero mu bice bimwe by'ako karere.
