Yanditswe na: NSENGIYUMVA J Damascene
10/08/2026 18:09
Amabendera ya Saudi Arabia, Pakistan na Türkiye yazamuwe ku nyubako za Leta no ku mihanda yo muri Islamabad, nyuma y’uko ibi bihugu bitatu bishyize umukono ku masezerano mashya y’ubwirinzi agamije kongera ubufatanye mu by’umutekano.
Aya masezerano yiswe “Mecca Joint Defence Agreement”, yashyiriweho umukono i Mecca ku wa Gatanu, aho ibi bihugu byemeranyije ko igitero cyagabwe kuri kimwe muri byo gishobora gufatwa nk’igitero kuri byose.
Iyi ngingo yatumye aya masezerano agereranywa n’ingingo ya gatanu y’amasezerano ashyiraho NATO, izwiho ihame ry’uko igitero kuri umwe mu banyamuryango gifatwa nk’igitero ku banyamuryango bose.
Mu murwa mukuru Islamabad, inyubako za Leta zacanye amatara y’amabara y’umutuku n’icyatsi, mu gihe amabendera y’ibi bihugu yazamuwe mu rwego rwo kwizihiza ubufatanye bushya.
Ku byapa n’amashusho byashyizwe ahagaragara, hagaragajwe abayobozi bakuru b’ibi bihugu, barimo Minisitiri w’Intebe wa Pakistan, Shehbaz Sharif, Igikomangoma cy’Ikamba cya Saudi Arabia, Mohammed bin Salman, Perezida wa Türkiye, Recep Tayyip Erdogan, ndetse n’Umugaba Mukuru w’Ingabo za Pakistan, Field Marshal Syed Asim Munir.
Abaturage bo muri Islamabad bavuze ko aya masezerano ashobora gufasha ibi bihugu kurushaho guhuza imbaraga mu gihe kimwe muri byo cyaba gihanganye n’igitero.
Umwe mu baturage, Samama Sajawal, yavuze ko mu gihe intambara yaba hagati y’ibihugu cyangwa kimwe muri ibi bihugu kigaterwa, ubufatanye nk’ubu bushobora gutuma ibihugu by’Abayisilamu birushaho kugira ijwi rimwe mu bibazo by’umutekano.
Undi muturage, Mohammad Imran, yavuze ko aya masezerano ashobora kuba intangiriro y’umuryango mugari w’ibihugu by’Abarabu n’ibindi bihugu by’akarere, ufite ubushobozi bwo kugira uruhare mu kubungabunga amahoro.
Yavuze ko amasezerano atagomba kurebwa gusa nk’ubufatanye mu bya gisirikare, ahubwo ko ashobora no kuba umusingi w’ubufatanye bugamije amahoro mu karere ka Gulf no hanze yako.
Wasim Khan, undi muturage wo muri Islamabad, yavuze ko kuba ibi bihugu bitatu byatangaje ku mugaragaro ko igitero kuri kimwe cyafatwa nk’igitero kuri byose ari ubutumwa bukomeye ku bijyanye n’umutekano.
Yavuze ko kuba Saudi Arabia, Pakistan na Türkiye ari ibihugu byigenga kandi bifite ubushobozi bwa gisirikare, bishobora gutuma ubu bufatanye bufatwa nk’ubufite uburemere mu karere.
Mu itangazo rihuriweho ryasohowe n’ibi bihugu, byavuze ko aya masezerano ashingiye ku mubano umaze igihe hagati yabyo, ndetse n’ubuvandimwe n’ubufatanye bw’Abayisilamu bubihuza.
Aya masezerano aje mu gihe Saudi Arabia, Pakistan na Türkiye bikomeje gushaka uburyo bwo kurushaho kunoza ubufatanye mu bijyanye n’umutekano n’izindi gahunda z’inyungu zihuriweho.
Uko aya masezerano azashyirwa mu bikorwa ndetse n’ingaruka azagira ku mibanire y’ibihugu byo mu karere ndetse n’ubufatanye mpuzamahanga mu by’umutekano, bizagenda bigaragara uko igihe kigenda.
