Yanditswe na: NSENGIYUMVA J Damascene
10/08/2026 18:28
Umuyobozi w’ishyaka Reform UK, Nigel Farage, yavuze ko ubwinshi bw’abimukira bambuka English Channel bava mu Bufaransa ari “ikibazo cy’umutekano w’igihugu”, asaba ko Guverinoma y’u Bwongereza ko yafata ingamba zikomeye zo kugenzura abinjira mu gihugu.
Farage yabivugiye i London ku wa Mbere, nyuma y’uko ubwato buto ariko bunini cyane butwaye abantu 230 bugezwe ku cyambu cya Dover mu rukerera. Yavuze ko uwo mubare ari uwa mbere munini cyane ugaragaye mu bwato bumwe muri uru rugendo.
Uyu munyapolitiki yavuze ko nubwo umubare w’abimukira bambuka Channel muri uyu mwaka ushobora kuba uri munsi y’uwo mu mwaka ushize, akomeza kubona ko ikibazo gikomeye.
Farage yavuze ko ubwato bukoreshwa mu kwambutsa abimukira bugenda burushaho kuba bunini, ku buryo u Bwongereza bushobora kuzajya buhura n’abantu benshi cyane binjira muri icyo gihugu buri munsi.
Yagize ati ubwinshi bw’abimukira bakomeje kugera ku nkombe z’u Bwongereza buteye impungenge, avuga ko igihugu gikeneye gufata ikibazo nk’ikijyanye n’umutekano w’igihugu.
Farage yavuze ko mu gihe ayoboye Guverinoma, yakoresha Royal Navy, ingabo zirwanira mu mazi z’u Bwongereza, mu rwego rwo guhagarika ubwato bw’abimukira bugana ku nkombe z’igihugu.
Yabwiye abanyamakuru ko amaze igihe asaba ko hafatwa ingamba zikomeye zo kugenzura abimukira, ndetse avuga ko yari yaraburiye Umuryango w’Ubumwe bw’u Burayi ku ngaruka z’imikorere yawo ku bibazo by’ubuhunzi n’abimukira.
Uyu munyapolitiki kandi yavuze ko hari impungenge z’uko bamwe mu binjira mu gihugu bashobora kuba bafite aho bahuriye n’ibikorwa by’iterabwoba, nubwo ibyo yavuze atatanze ibimenyetso bifatika kuri abo bantu bose.
Iki kibazo gikomeje kuba kimwe mu bibazo bikomeye bitera impaka muri politiki y’u Bwongereza, cyane cyane ku bijyanye n’uburyo igihugu kigomba gucunga imipaka no kwakira abasaba ubuhungiro.
Farage n’ishyaka rye rya Reform UK bakunze gusaba ko u Bwongereza bugabanya umubare w’abimukira kandi bugashyiraho ingamba zikomeye zo kurinda imipaka.
Mu minsi ishize, ikibazo cy’abimukira muri Afurika y’Amajyaruguru cyongeye kuvugwa cyane nyuma y’amashusho yakwirakwiye ku mbuga nkoranyambaga agaragaza umubare munini w’abantu bagerageza kwinjira muri Ceuta, agace ka Espagne kari ku mugabane wa Afurika.
Ibi byongeye kuzamura impaka ku buryo ibihugu by’i Burayi bikwiye guhangana n’ikibazo cy’abimukira, cyane cyane mu gihe bamwe mu banyapolitiki basaba ko hakazwa igenzura ry’imipaka.
Reform UK ya Farage imaze igihe igaragara cyane mu biganiro bya politiki y’u Bwongereza, cyane cyane ku bibazo by’abimukira, imipaka n’imibanire y’igihugu n’Umuryango w’Ubumwe bw’u Burayi.
Farage kandi yari umwe mu bantu bakomeye bagize uruhare mu bukangurambaga bwatumye u Bwongereza butora kuva mu Muryango w’Ubumwe bw’u Burayi muri referendum yo mu 2016.
Kugeza ubu, ikibazo cy’abimukira bambuka English Channel gikomeje gushyira igitutu kuri Guverinoma y’u Bwongereza, mu gihe amashyaka ya politiki atandukanye akomeje gutanga ibisubizo bitandukanye ku buryo iki kibazo cyakemuka.
