Yanditswe na: NSENGIYUMVA J Damascene
11/08/2026 19:27
Umuriro ukomeye wadutse ku kigega cya lisansi muri Zawiya Refinery, mu burengerazuba bwa Libya, nyuma y’uko icyo kigega gikubiswe n’igitero, bituma abaturage bo mu gace kegereye uruganda batangira kwimurwa.
Amashusho yagaragaje umuriro mwinshi waturutse ku kigega cya lisansi, mu gihe umwotsi mwinshi wazamutse ugatwikira igice kinini cy’uruganda n’ahaturiye.
Ikigo cya Libya gishinzwe peteroli, National Oil Corporation (NOC), cyatangaje ko ikigega cya Brega Oil Marketing Company ari cyo cyibasiwe, maze kigafatwa n’inkongi.
Iki kigega cyari kirimo hafi litiro miliyoni 4.5 za lisansi, bituma inkongi iba ikomeye kandi iteza impungenge ku baturage bari hafi y’uruganda.
Nyuma y’inkongi, abaturage bari batuye hafi y’uruganda rwa Zawiya batangiye kwimurwa mu rwego rwo kubarinda ingaruka z’umuriro n’umwotsi mwinshi.
Abakozi bashinzwe ubutabazi n’abazimya umuriro bahise batangira ibikorwa byo guhangana n’inkongi, mu gihe abayobozi baburiye abaturage ku kaga gashobora guterwa n’umwotsi mwinshi wakwirakwiriye mu gace.
NOC yavuze ko iki gitero ari kimwe mu bitero bikomeje kwibasira ibikorwa remezo by’ingenzi biri mu mujyi wa Zawiya.
NOC yatangaje ko ikindi kigega cya peteroli muri uru ruganda cyari cyibasiwe n’indege nto itagira umupilote (drone) ku wa Gatandatu.
Ikigo kandi cyavuze ko n’ikigo gitunganya amazi y’inyanja cyibasiwe, mu gihe nta mutwe wigeze utangaza ko ari wo wakoze ibi bitero.
NOC yihanangirije ko ibitero bikomeje bishobora gutuma uruganda rwa Zawiya ruhagarika ibikorwa byarwo, ibintu bishobora kugira ingaruka ku itangwa rya lisansi n’ibindi bikomoka kuri peteroli muri Libya.
Ibi bitero bibaye nyuma y’iminsi yaranzwe n’imirwano ikomeye hagati y’amatsinda yitwaje intwaro ahanganye mu burengerazuba bwa Libya.
Mu mirwano harimo imitwe ifitanye isano na Anti-Security Threats Apparatus ndetse na 103rd Infantry Battalion.
Abantu nibura bane barishwe, abandi 10 barakomereka mu mirwano yabaye mu cyumweru gishize.
Nyuma y’iyi mirwano, Minisitiri w’Intebe wa Libya, Abdul Hamid Dbeibeh, yayoboye inama y’umutekano yo kurebera hamwe uko imvururu zahagarikwa.
Dbeibeh yashimangiye ko hakenewe ingamba zikomeye zo guhangana n’ibikorwa byose bishobora guhungabanya umutekano cyangwa kwangiza ibikorwa remezo by’ingenzi.
Libya ikomeje kuba igihugu kigabanyijwe hagati y’ubutegetsi buhanganye buri mu burasirazuba no mu burengerazuba bw’igihugu.
Amatsinda yitwaje intwaro aracyafite uruhare rukomeye mu mutekano no mu miyoborere y’uduce dutandukanye, nubwo hashize imyaka irenga icumi ubutegetsi bwa Muammar Gaddafi buhiritswe.
Igitero cyibasiye uruganda rwa Zawiya cyongeye kugaragaza uburyo ibikorwa remezo bya peteroli bikomeje kuba mu byibasirwa cyane mu gihe Libya ikomeje guhangana n’umutekano muke n’amacakubiri ya politiki.
