Yanditswe na: NSANZABERA Jean Paul
13/08/2026 09:16
Perezida wa
Repubulika y’u Rwanda, Paul Kagame, yitabiriye umukino wa UEFA Super Cup 2026 wabereye
i Salzburg muri Austria, wahuje amakipe abiri afitanye ubufatanye na gahunda ya
Visit Rwanda.
Umukino
wahuje Paris Saint-Germain (PSG), yatwaye UEFA Champions League, na Aston Villa,
yatwaye UEFA Europa League. Uyu mukino wari ingenzi cyane ku ruhande rw’u
Rwanda kuko aya makipe yombi ari abafatanyabikorwa ba Visit Rwanda mu guteza
imbere ubukerarugendo no kumenyekanisha igihugu ku rwego mpuzamahanga.
PSG yaje
gutsinda Aston Villa ibitego 2-1, ihita yegukana UEFA Super Cup 2026.
Kwitabira
uyu mukino kwa Perezida Kagame byagaragaje uburemere u Rwanda ruha ubufatanye
rufitanye n’amakipe akomeye yo ku mugabane w’u Burayi.
PSG imaze
imyaka ifitanye ubufatanye na Visit Rwanda, mu gihe Aston Villa ari umwe mu
bafatanyabikorwa bashya b’u Rwanda mu mupira w’amaguru. Ubufatanye nk’ubu
butuma izina Visit Rwanda rigera ku bafana b’umupira w’amaguru hirya no hino ku
isi.
Aston Villa
yatangiye ubufatanye bushya na Visit Rwanda mu 2026, mu gihe PSG na yo ikomeje
kuba umwe mu bafatanyabikorwa b’ingenzi mu kumenyekanisha ubukerarugendo bw’u
Rwanda.
Mu mukino
wabereye i Salzburg ku wa 12 Kanama 2026, PSG yafunguye amazamu ku gitego cya Khvicha
Kvaratskhelia ku munota wa 20. Aston Villa yaje kwishyura mbere y’uko igice cya
mbere kirangira, ariko PSG yongera kubona igitego cya kabiri cyatsinzwe na Désiré
Doué ku munota wa 61.
PSG yaje
kubasha kurinda icyo yagezeho, itsinda Aston Villa ibitego 2-1, bityo yegukana
UEFA Super Cup ya 2026.
Uyu mukino
kandi wari udasanzwe kuko wasifuwe n’Umunya-Somalia Omar Abdulkadir Artan,
wabaye umusifuzi wa mbere utari Umunyaburayi uhawe kuyobora umukino wa UEFA
Super Cup.
Kuri Perezida Kagame, kwitabira uyu mukino byabaye andi mahirwe yo kugaragaza uruhare rw’u Rwanda mu mikoranire mpuzamahanga ikoresha siporo nk’inzira yo guteza imbere ubukerarugendo, ubucuruzi no kumenyekanisha igihugu.
Like This Post? Related Posts
