Yanditswe na: NDAYISENGA Clement
13/08/2026 14:36
Umuyobozi mukuru w’Ishami ry’Umuryango w’Abibumbye ryita ku Buzima (OMS/WHO), Tedros Adhanom Ghebreyesus, yavuze ko icyorezo cya Ebola kiri muri Repubulika Iharanira Demokarasi ya Congo (RDC), gishobora kuba icyahitanye abantu benshi kurusha ibindi byorezo bya Ebola byabayeho mbere, mu gihe ingamba zo kukirwanya zitagira icyo zihindura ku muvuduko wacyo.
Tedros yabwiye abanyamakuru ko, “niba icyorezo gikomeje kwiyongera ku muvuduko kiriho ubu,” gishobora kurenza icyorezo cyabaye hagati ya 2014 na 2016 muri Afurika y’Iburengerazuba, cyahitanye abantu barenga 11,000.
Icyorezo kiri muri RDC cyatangajwe ku mugaragaro ku wa 15 Gicurasi, ariko inzego z’ubuzima zivuga ko bishoboka ko cyari cyaratangiye gukwirakwira nibura amezi atatu mbere y’uko gitangazwa.
Kugeza ubu, habaruwe abarenga 4,300 banduye, mu gihe abarenga 2,000 bamaze guhitanwa n’iyo ndwara.
OMS yatangaje ko yizeye ko mu gihe cy’amezi atatu ishobora kuba yagabanyije ku buryo bukomeye ikwirakwira ry’icyorezo. Icyakora, uyu muryango wihanangirije ko kugabanya umuvuduko w’ubwandu bidahita bisobanura ko Ebola izaba yarangiye burundu.
Ebola yo mu bwoko bwa Bundibugyo
Iki cyorezo cyatewe na virusi ya Ebola yo mu bwoko bwa Bundibugyo, ubwoko budakunze kuboneka cyane. Kugeza ubu, bwari bwaragaragaye mu byorezo bikomeye inshuro nke gusa, zirimo ibyabaye mu 2007 no mu 2012. Kugeza ubu, nta rukingo cyangwa umuti wihariye wemejwe wo kuvura Ebola yo mu bwoko bwa Bundibugyo.
Icyorezo cyibasiye cyane cyane ibice byo mu burasirazuba bwa RDC, ahakomeje kugaragara umutekano muke. Ibi byatumye abakozi b’ubuzima bagira ingorane mu kugera ku barwayi no gukurikirana abantu bashobora kuba baranduye.
Umuyobozi wa OMS muri Afurika, Mohamed Janabi, yavuze ko kubera izo mbogamizi, abakozi b’ubuzima bashobora kugera kuri hafi 30% gusa by’abantu banduye.
Ibimenyetso n’uko Ebola yandura
Ebola ni indwara ikomeye iterwa na virusi kandi ishobora guhitana umuntu mu gihe gito, cyane cyane iyo atabonye ubuvuzi hakiri kare. Ibimenyetso bishobora kugaragara hagati y’iminsi 2 na 21 nyuma yo kwandura.
Mu ntangiriro, umurwayi ashobora kugira umuriro mwinshi, kubabara umutwe, umunaniro no kugira ububabare bw’imitsi, ibimenyetso bishobora gusa n’ibya malaria cyangwa grippe.
Uko indwara ikomeza gukara, umurwayi ashobora kugira kuruka no guhitwa, kandi mu bihe bikomeye bishobora gutera kwangirika kw’ingingo z’umubiri no kuva amaraso. Virusi ya Ebola ikwirakwira cyane binyuze mu guhura n’amazi cyangwa ibindi bisohoka mu mubiri w’umuntu wanduye, birimo amaraso, ibirutsi, amacandwe n’ibindi bisohoka mu mubiri.
Hatangiye ubushakashatsi ku rukingo
Mu Bwongereza, ikigo gishinzwe kugenzura imiti n’inkingo, MHRA, cyemereye abashakashatsi gutangira igerageza rya mbere ku bantu ry’urukingo rugamije kurwanya Ebola yo mu bwoko bwa Bundibugyo.
Uru rukingo rurimo gukorwa n’abashakashatsi bo muri Kaminuza ya Oxford, bakoresheje ikoranabuhanga risa n’iryakoreshejwe mu gukora urukingo rwa Oxford-AstraZeneca rwakoreshejwe mu kurwanya COVID-19. Hari kandi andi matsinda atatu y’abashakashatsi ari gukora ku zindi nkingo zishobora kurwanya ubu bwoko bwa Ebola, nubwo izo nkingo zitaragera ku cyiciro cyo kugeragerezwa ku bantu.
OMS kandi iri gutera inkunga ubushakashatsi bw’ubuvuzi bukorerwa muri RDC, bugamije kureba niba imiti ibiri isanzwe ikoreshwa mu kuvura indwara ziterwa na virusi ishobora gufasha kongera amahirwe yo kurokoka ku barwayi ba Ebola.
Mu gihe umutekano muke n’ibibazo byo kugera ku barwayi bikomeje kuba imbogamizi, inzego z’ubuzima zivuga ko kwihutisha ubuvuzi, gukurikirana abanduye no guteza imbere urukingo ari bimwe mu by’ingenzi mu kugabanya ubukana bw’iki cyorezo.
Like This Post? Related Posts
