Yanditswe na: NSENGIYUMVA J Damascene
14/08/2026 12:00
Misiri iri gusuzuma ku buryo bukomeye amahirwe yo kwinjira mu Masezerano y’Ubwirinzi Buhuriweho ya Mecca, yashyizweho na Saudi Arabia, Türkiye na Pakistan.
Minisitiri w’Ububanyi n’Amahanga wa Misiri, Badr Abdelatty, yabivuze kuri uyu wa Kane, nyuma y’ibiganiro yagiranye na mugenzi we wa Türkiye, Hakan Fidan.
Abdelatty yavuze ko Misiri iri gukorana bya hafi n’ibindi bihugu bigize uru rwego, ndetse ko ikibazo cyo kwinjira muri aya masezerano kiri gusuzumwa hifashishijwe amategeko, ibijyanye n’imikorere n’amahame agenga Itegeko Nshinga, mbere y’uko hafatwa icyemezo cya nyuma.
Ati: “Turimo kubisuzuma mu buryo bwimbitse kandi bwitondewe, tureba impande zitandukanye, kuko hari ibibazo by’amategeko, tekiniki n’Itegeko Nshinga bigomba kubanza gusuzumwa no gukemurwa.”
Minisitiri Hakan Fidan we yavuze ko aya masezerano atagamije kurwanya cyangwa kwibasira ikindi gihugu, ahubwo agamije gukomeza ubufatanye mu mutekano, kubahiriza ubusugire bw’ibihugu no guteza imbere imibereho myiza y’abaturage bo mu karere.
Fidan yavuze kandi ko ibihugu byo mu karere bifite inshingano zo kwishakira ibisubizo ku bibazo by’umutekano bibangamiye akarere.
Yagarutse ku bufatanye mu by’umutekano hagati ya Israel, Greece na Cyprus y’Abagiriki, avuga ko na bwo ari ubufatanye bw’umutekano bwashyizweho mu karere ka Mediterane.
Saudi Arabia, Türkiye na Pakistan byashyize umukono ku masezerano y’ubwirinzi buhuriweho i Mecca ku wa 7 Kanama 2026.
Aya masezerano ashyiraho uburyo bw’ubwirinzi rusange, busa n’ubuteganywa n’Ingingo ya 5 y’Amasezerano agenga NATO. Bivuze ko igitero cya gisirikare cyagabwa ku gihugu kimwe mu bigize aya masezerano gifatwa nk’igitero ku bindi, bigateza ko ibyo bihugu byose bifatanya mu kwirwanaho.
