Yanditswe na: NSENGIYUMVA J Damascene
14/08/2026 12:24
Umuntu umwe yapfuye, abandi benshi barakomereka nyuma y’iturika rikomeye ryabereye ku kigo kibika ibikomoka kuri peteroli ku cyambu cya Rotterdam mu Buholandi, ku wa Kane.
Iturika ryabereye ku kigo cya Gunvor Energy giherereye mu gace ka Europoort, ahagana saa 11:30 za mu gitondo ku isaha y’aho, ubwo hakorwaga imirimo yo gusana ikigega kibikwamo ibikomoka kuri peteroli.
Amashusho yafashwe nyuma y’iturika yagaragaje ikigega cyangiritse, mu gihe abashinzwe ubutabazi n’abanyamakuru bari bateraniye hafi y’aho impanuka yabereye.
Polisi yahise ifunga ako gace, itangira iperereza rigamije kumenya icyateye iryo turika. Abayobozi bavuze ko nta bimenyetso byahise bigaragaza ko ari igikorwa cy’ubugizi bwa nabi cyangwa ubushotoranyi, ariko ko hakomeje gusuzumwa impamvu zose zishoboka.
Ku rundi ruhande, mbere y’iturika habaye umuriro w’amashanyarazi wagiye mu bice bitandukanye by’icyambu, bituma ibikorwa bimwe by’inganda bihagarara by’agateganyo. Ubuyobozi bw’icyambu cya Rotterdam bwavuze ko icyo kibazo cy’amashanyarazi nta sano gifitanye n’iturika.
Icyambu cya Rotterdam ni cyo kinini kurusha ibindi mu Burayi, kandi gifite inganda nini zitunganya peteroli, izikora imiti n’ibindi bikomoka kuri peteroli, ndetse n’ibigo bibikwamo ibikomoka kuri peteroli.
