Yanditswe na: NSANZABERA Jean Paul
01/09/2026 07:53
Uwahoze ari Perezida wa Venezuela, Nicolás Maduro, yashyize ku mbuga nkoranyambaga amafoto abiri agaragaza uko ameze aho afungiye muri Leta Zunze Ubumwe za Amerika.
Ni ubwa mbere amafoto ye afashwe ari muri gereza yo muri Amerika ashyizwe ku karubanda kuva yafatwa muri Mutarama 2026.
Muri ayo mafoto, Maduro agaragara yambaye imyenda y’ivu isa n’imyambaro y’abafungwa, aseka ndetse azamura intoki akora ikimenyetso cya V, gisanzwe gikoreshwa mu kugaragaza amahoro cyangwa intsinzi. Amakuru yatangajwe avuga ko bigaragara ko yagabanutse ibiro ugereranyije n’uko yari asanzwe agaragara mbere yo gufatwa.
Maduro yavuze ko ayo mafoto ayohereje nk’“impano nto y’urukundo n’ibyiringiro” igenewe abuzukuru be, abana ndetse n’abantu bamushyigikiye. Yashimiye abamushyigikiye, avuga ko we n’umugore we, Cilia Flores, bakomeje gushikama kandi bafite icyizere.
Mu butumwa bwaherekeje ayo mafoto, Maduro yagaragaje kandi ko afite ukwizera gukomeye, avuga ko Imana iri kumwe na bo kandi ko yizeye ko Venezuela izongera kuzahuka.
Aya mafoto yatangajwe ku mbuga nkoranyambaga ku wa 30 Kanama 2026, ariko amakuru y’ifoto agaragaza ko yafashwe ku wa 25 Kamena 2026. Icyakora, ntabwo haratangazwa ku mugaragaro uko ayo mafoto yafashwe cyangwa uwemeye ko afatwa n’uko yagejejwe ku mbuga nkoranyambaga.
Maduro n’umugore we Cilia Flores bafungiwe muri Metropolitan Detention Center i Brooklyn, muri New York, nyuma yo gufatwa n’ingabo za Amerika mu gikorwa cyabereye i Caracas ku wa 3 Mutarama 2026. Bombi bahakana ibyaha baregwa birimo ibyerekeye ubucuruzi bw’ibiyobyabwenge n’ibyaha bijyanye n’intwaro.
Urubanza rwa Maduro na Flores ruteganyijwe gutangira ku wa 1 Kamena 2027 muri New York.
Kugaragara kwa Maduro muri aya mafoto byakuruye abantu benshi, cyane cyane kubera ko yabashije kugaragara aseka kandi asa n’uwifitiye umutuzo, mu gihe ari mu maboko y’ubutabera bw’Amerika kandi ategereje kuburanishwa.
