• Umugabo wa Perezida Samia Suluhu Hassan yashyinguwe mu cyubahiro muri Zanzibar

Umugabo wa Perezida wa Tanzania, Samia Suluhu Hassan, Hafidh Ameir Hassan, yashyinguwe ku wa Mbere tariki ya 7 Nzeri 2026, mu muhango wabereye i Kizimkazi, mu Majyepfo ya Unguja muri Zanzibar, nyuma y’amasaha make atabarutse.

Hafidh Ameir Hassan yitabye Imana mu gitondo cyo ku wa Mbere ahagana saa mbili za mu gitondo, ubwo yari ari kuvurirwa mu Bitaro bya Emilio Mzena Memorial Hospital i Zanzibar. Abayobozi bavuze ko yari amaze igihe arwaye indwara y’umutima.

Umuhango wo kumushyingura wabereye i Kizimkazi, ahafitanye isano n’umuryango we. Amasengesho yo kumusezeraho yayobowe na Grand Mufti wa Zanzibar, Sheikh Saleh Omar Kaabi, mbere y’uko ashyingurwa hakurikijwe imigenzo ya Kisilamu.

Mu bayobozi bakomeye bitabiriye umuhango harimo Visi Perezida wa Tanzania Deogratius Ndejembi, Perezida wa Zanzibar Hussein Ali Mwinyi, Minisitiri w’Intebe Mwigulu Nchemba, ndetse n’abandi bayobozi bakuru ba Tanzania na Zanzibar.

Hari kandi abahoze ari abayobozi bakuru barimo Jakaya Kikwete, wahoze ari Perezida wa Tanzania, ndetse n’abahoze ari ba Perezida ba Zanzibar Amani Abeid Karume na Ali Mohammed Shein.

Hafidh Ameir Hassan yavukiye ku wa 1 Mutarama 1946 mu gace ka Kisakasaka muri Unguja. Yize amashuri abanza ku ishuri rya Kombeni Shakani, arangiza ayisumbuye kuri Tumekuja Secondary School mu 1965.

Mu 1970 yinjiye muri Zanzibar Teachers’ College, ayarangiza mu 1973, nyuma akora nk’umwarimu mu mashuri atandukanye muri Tanzania.

Nyuma yaje kwiga ibijyanye n'ubuhinzi, aho mu 1980 yagiye muri Uyole Agricultural College i Mbeya. Mu 1982 yatangiye gukora nk’umwigisha w’ubuhinzi kuri Fidel Castro School i Pemba.

Mu 1986 yagiye muri Sri Lanka kwiga ibijyanye n'ubuhinzi bw’imikindo, arangiza mu 1988. Nyuma yagarutse Zanzibar akomeza gukorera muri Minisiteri y’Ubuhinzi. Yaje kandi kwiga icyiciro cya Master's mu Bwongereza, mu bijyanye n’imashini zikoreshwa mu buhinzi.

Yasezeye ku kazi muri Minisiteri y’Ubuhinzi mu 2005, ariko akomeza kugira uruhare mu burezi, cyane cyane yigisha muri Kizimbani Agricultural College i Unguja.

Hafidh Ameir yari umuntu utaranzwe no kugaragara cyane muri politiki cyangwa mu bikorwa bya Leta, nubwo umugore we, Samia Suluhu Hassan, ari Perezida wa Tanzania.

Samia Suluhu Hassan amaze kuba Perezida muri Werurwe 2021, Hafidh yabaye First Gentleman wa Tanzania, akaba yari umugabo wa mbere w’Umukuru w’Igihugu w’umugore muri Tanzania wari ufite uwo mwanya. Yari azwi cyane nk’umuntu washyigikiraga umugore we mu buzima bw’umuryango no mu nshingano ze za Leta, ariko agakomeza ubuzima bwe bwite kure y’itangazamakuru.

Hafidh Ameir Hassan asize abana bane n’abuzukuru 15, ndetse amakuru yatangajwe nyuma y’umuhango wo kumushyingura avuga ko asize n’abagore babiri.

Urupfu rwe rwakurikiwe n’ubutumwa bw’akababaro bwaturutse ku bayobozi batandukanye bo muri Afurika. Perezida wa Kenya William Ruto, Perezida w’u Rwanda Paul Kagame, Perezida w’u Burundi Évariste Ndayishimiye, Minisitiri w’Intebe wa Ethiopia Abiy Ahmed, Perezida wa Somalia Hassan Sheikh Mohamud na Perezida wa Zambia Hakainde Hichilema bari mu bayobozi bohereje ubutumwa bwo kwihanganisha Samia Suluhu Hassan n’umuryango we.

Urupfu rwa Hafidh rwabaye mu gihe Tanzania yari ikomeje ibikorwa bya Leta bisanzwe, ariko amakuru ye akwirakwira vuba mu gihugu no mu karere kubera umwanya yari afite nk’umugabo wa Perezida.

 

Like This Post?

• Share On:

Related Posts

---