• Nyuma y’imyaka 25 ibitero byo ku wa 11 Nzeri bibaye, Papa Léon XIV yasabye amahoro

Nyuma y’imyaka 25 ibitero by’iterabwoba byo ku wa 11 Nzeri 2001 bibaye muri Leta Zunze Ubumwe za Amerika, Papa Léon XIV yunamiye abazize ibyo bitero, asaba abantu kongera imbaraga mu guharanira amahoro ku Isi.

Papa Léon XIV yagarutse kuri aya mateka ku Cyumweru, ubwo yari arangije umuhango usanzwe wo gusabira abakirisitu no kubaha umugisha wo ku Cyumweru, awutangirira ku idirishya rya studio ye ireba kuri Place Saint-Pierre, i Vatican.

Papa, wavukiye i Chicago muri Leta Zunze Ubumwe za Amerika, yavuze ubutumwa bwe mu rurimi rw’Icyongereza, ashimangira ko agikomeza gusabira abazize ibitero byo ku wa 11 Nzeri ndetse n’abakomeje kubana n’ingaruka zabyo.

Yagize ati: “Nongera amasengesho yanjye nsabira abatakaje ubuzima ndetse n’abakomeje gutwara ibikomere by’uyu munsi w’akaga.”

Papa Léon XIV yakomeje asaba abantu bose gusenga kugira ngo amahoro abe mu bihugu bitandukanye, cyane cyane muri iki gihe Isi ikomeje guhura n’intambara n’ubugizi bwa nabi.

Yagize ati: “Mu gihe amakimbirane n’urugomo bikomeje kugera kuri benshi mu bavandimwe na bashiki bacu, ndasaba buri wese gusenga kugira ngo Nyagasani ahe Isi impano y’amahoro.”

Ubu ni bwo bwa mbere Papa Léon XIV atangarije ku mugaragaro ubutumwa bujyanye no kwibuka ibitero byo ku wa 11 Nzeri kuva yatorerwa kuyobora Kiliziya Gatolika.

Ibitero byo ku wa 11 Nzeri 2001 byabaye ku butaka bwa Leta Zunze Ubumwe za Amerika, aho indege zashimuswe n’abagabye ibitero zagabwe ku nyubako zitandukanye, birimo inyubako z’Ikigo cy’Ubucuruzi Mpuzamahanga cya World Trade Center i New York ndetse n’inyubako ya Pentagon.

Ibyo bitero byahitanye abantu benshi kandi byagize ingaruka zikomeye ku mutekano w’Isi no ku mubano w’ibihugu, bituma habaho impinduka zikomeye mu buryo bwo kurwanya iterabwoba ku rwego mpuzamahanga.

Muri icyo gihe, Papa Léon XIV wari ukitwa Robert Prevost, yari i Roma mu Butaliyani, aho yari yitabiriye inama ikomeye y’umuryango w’idini ry’Abaugustini, ari na wo muryango w’idini yari abarizwamo.

Icyo gihe yari ayoboye ishami ry’Abaugustini muri Leta Zunze Ubumwe za Amerika, rifite icyicaro i Chicago, umujyi yavukiyemo.

Nyuma y’iminsi itatu gusa ibitero bibaye, ku wa 14 Nzeri 2001, Robert Prevost yagizwe Umuyobozi Mukuru w’umuryango w’Abaugustini ku Isi. Icyo gihe kandi yari umunsi wo kwizihiza isabukuru ye y’amavuko.

Yaje gukomeza kuri uwo mwanya mu manda ebyiri, kugeza mu mwaka wa 2012.

Nyuma y’imyaka 25 ibyo bitero bibaye, Papa Léon XIV yahisemo kwibuka abazize ibyabaye cyane cyane abinyujije mu isengesho no guhamagarira abantu guharanira amahoro.

Ubutumwa bwe buje mu gihe Isi ikomeje guhura n’intambara, amakimbirane n’ibikorwa by’urugomo mu bice bitandukanye, ibintu bikomeje gutuma abaturage benshi bahasiga ubuzima ndetse abandi bagahunga ibyabo.

Papa yavuze ko kwibuka abahitanywe n’ibitero nk’ibyo bidakwiye kugarukira gusa ku kwibuka amateka, ahubwo ko bikwiye no kuba umwanya wo kongera gutekereza ku gaciro k’ubuzima bwa muntu, kubana mu mahoro no kwirinda ibikorwa by’urugomo.

 

Ku itariki ya 11 Nzeri 2001, ibitero by’iterabwoba byibasiye Leta Zunze Ubumwe za Amerika byahinduye cyane imiterere y’umutekano ku Isi.

Kuva icyo gihe, ibihugu byinshi byongereye ingamba zo kurwanya iterabwoba, mu gihe ikibazo cy’umutekano mpuzamahanga cyakomeje kuba kimwe mu bibazo by’ingenzi ku rwego rw’Isi.

Papa Léon XIV, mu butumwa bwe bwo kwibuka iyi myaka 25, yashimangiye ko nubwo amateka adashobora gusubirwamo, abantu bashobora kuyigiramo amasomo, bagaharanira ko ibyabaye bitazongera kubaho ndetse bakubaka Isi irangwa n’amahoro n’ubwubahane.

Ubutumwa bwe bushingiye ku isengesho bwasobanuwe nk’ubusabe bwo kugira ngo abantu bakomeze kwibuka abazize ibitero, ariko nanone bakore ibishoboka byose kugira ngo urugomo n’amakimbirane bitongera guteza ibyago nk’ibyo mu bihe biri imbere.

 

Like This Post?

• Share On:

Related Posts

---