Evenepoel yegukanye iri rushanwa ryabereye i Montreal muri Canada ku Cyumweru, atsinda ku nshuro ya kane yikurikiranya nyuma y’ibikombe yegukanye i Glasgow, Zurich, Kigali hakiyongeraho na Montreal.

Uyu mukinnyi w’imyaka 26 abaye uwa mbere mu mateka wegukanye inshuro enye zikurikiranya Shampiyona y’Isi ya time trial, mu irushanwa ryatangiye gutangwa nk’irushanwa ryemewe na UCI mu 1994.

Mbere y’uko iri rushanwa ritangira, Grand Prix des Nations ni ryo ryafatwaga nk’irushanwa ridasanzwe rihagarariye Shampiyona y’Isi muri iyi myanya. Umufaransa Jacques Anquetil ni we waritsinze inshuro icyenda, harimo esheshatu zikurikiranya hagati ya 1953 na 1958.

Igikombe yegukanye i Montreal cyatumye Evenepoel aba umwe mu bakinnyi batatu bamaze kwegukana imidali ine ya zahabu ya Shampiyona y’Isi muri time trial.

Asanze abandi barimo Umusuwisi Fabian Cancellara wegukanye ibikombe mu 2006, 2007, 2009 na 2010, ndetse n’Umudage Tony Martin wabitsinze mu 2011, 2012, 2013 na 2016.

Ibi bivuze ko Evenepoel ashobora kwandika undi murongo mushya mu mateka mu mwaka utaha, kuko Shampiyona y’Isi izabera muri Haute-Savoie mu Bufaransa, aho hazaba harimo gusiganwa n’amasaha hafi y’ikiyaga cya Annecy, mu gihe byakongera kwisubiramo, akazaba ari we mukinnyi rukumbi ufite ibikombe bitanu bya Shampiyona y’Isi muri time trial.

Intsinzi ya Montreal kandi yakomeje uruhererekane rudasanzwe rwa Evenepoel mu gusiganwa n’amasaha. Uyu Mubiligi amaze gutsinda amasiganwa arindwi, akaba amaze igihe ataratsindwa kuva mu isiganwa ryo gusiganwa n’amasaha ryabereye i Peyragudes muri Tour de France ya 2025.

Kuva yegukana umudali wa zahabu mu gusiganwa n’amasaha mu mikino Olempike yabereye i Paris, Evenepoel amaze gutsinda 13 mu masiganwa 14 ya time trial amaze gukinamo.

Igikombe cya Shampiyona y’Isi cyo muri Montreal cyabaye intsinzi ya 79 ya Remco Evenepoel mu mwuga we wose, Muri izo ntsinzi 79, 27 yazibonye mu gusiganwa n’amasaha.

Ibi bivuze ko abarenga 34% by’intsinzi zose Evenepoel amaze kugira mu mwuga we yazibonye mu gusiganwa n’amasaha, imibare igaragaza ubuhanga budasanzwe afite muri iki gice. Evenepoel kandi yegereye indi mibare ikomeye yigeze kugerwaho n’uwahoze ari umwami w’umukino wo gusiganwa ku magare, Eddy Merckx.

Kuko uyu mugabo yigeze gutsinda amasiganwa 10 ya time trial yikurikiranya hagati ya shampiyona za 1972 na 1973, muri icyo gihe amasiganwa yo gusiganwa n’amasaha yari menshi cyane kurusha uko bimeze muri iki gihe. Muri izo ntsinzi za Merckx harimo eshatu muri Giro d’Italia n’izindi eshatu muri Tour de France.