• Ruto yasabye ko Afurika ihabwa imyanya ihoraho mu Kanama k’Umuryango w’Abibumbye gashinzwe Umutekano

Perezida wa Kenya, William Ruto, yasabye ko Afurika ihabwa imyanya ihoraho mu Kanama k’Umuryango w’Abibumbye gashinzwe Amahoro n’Umutekano, avuga ko umugabane ufite ibihugu 54 n’abaturage barenga miliyari 1.4 udakwiye gukomeza kutagira uruhare ruhoraho mu byemezo bikomeye birebana n’umutekano w’isi.

Ruto yabigarutseho ku wa Mbere ubwo yari yitabiriye inama yiswe Partners for Multilateralism Summit yabereye i New York.

Yavuze ko Afurika ari wo mugabane wonyine utagira uhagarariye mu buryo buhoraho muri aka Kanama gashinzwe gufata ibyemezo ku bibazo by’amahoro n’umutekano mpuzamahanga.

Ati: “Afurika ntishobora gukomeza kuba umugabane wonyine udafite uhagararirwa mu buryo buhoraho mu rwego rushinzwe amahoro n’umutekano mpuzamahanga.”

Ruto yavuze ko kuba Afurika ifite ibihugu 54 n’abaturage barenga miliyari 1.4 bituma ikwiye kugira uruhare rugaragara mu byemezo bigira ingaruka ku isi.

Yavuze ko ikibazo atari ukubura ubufatanye hagati y’ibihugu, ahubwo ko ari inzego n’amategeko mpuzamahanga atajyanye n’imihindagurikire y’isi.

Perezida Ruto kandi yavuze ko Afurika ishaka imikoranire n’ibindi bihugu aho kuba mu mwanya wo guhora ishingiye ku nkunga, ashimangira ko ibihugu by’Afurika bidakwiye guhatirwa guhitamo uruhande rumwe mu gihe bikorana n’ibihugu bikomeye ku isi.

“Ibihugu ntibikwiye guhatirwa guhitamo uruhande kugira ngo bikorane. Ntidushobora kongera kubaka icyizere tuvugana gusa n’abo duhuje ibitekerezo,” Ruto yavuze.

Umuryango wa Afurika Yunze Ubumwe umaze igihe usaba ko Afurika ihabwa nibura imyanya ibiri ihoraho n’indi myanya ibiri idahoraho mu Kanama k’Umuryango w’Abibumbye gashinzwe Amahoro n’Umutekano.

Iyi gahunda iri mu rwego rwo gusaba ko imiterere y’akanama yahinduka kugira ngo ihagararire neza uko isi iteye muri iki gihe.

Ruto yavuze ko amahame mpuzamahanga ashobora gukomeza kubahirizwa, ariko inzego zashyizweho mu myaka myinshi ishize zikwiye kuvugururwa kugira ngo zijyane n’ibihe.

Inama ya Partners for Multilateralism (P4M) yitabiriwe n’abayobozi batandukanye, barimo Perezida w’Inama y’Ubumwe bw’u Burayi, António Costa, na Minisitiri w’Intebe wa Canada, Mark Carney.

Abitabiriye iyi nama bongeye gushimangira ko bashyigikiye gahunda y’imikoranire mpuzamahanga ishingiye ku Masezerano y’Umuryango w’Abibumbye, ariko basaba ko inzego mpuzamahanga zirushaho kuba izihagarariye abantu benshi, zirimo bose kandi zigira ubushobozi bwo gukemura ibibazo by’isi.

Like This Post?

• Share On:

Related Posts

---