Yanditswe na: NSENGIYUMVA J Damascene
23/09/2026 12:32
Ingabo za Israel zasenye amazu menshi mu mujyi wa Al Mansouri, mu karere ka Tyre mu majyepfo ya Lebanon, zikoresheje ibisasu bikomeye, mu gihe abasirikare n’ibinyabiziga bya gisirikare byakomeje kugenda muri ako gace.
Amashusho yaturutse muri ako gace agaragaza ibisasu biturika mu
gace gatuwemo, umwotsi mwinshi uzamuka mu kirere, ndetse n’ibisasu bya rutura
byaguye ku kibuga cyo hagati mu mujyi no hafi y’inyanja.
Amakuru
yatangajwe n’ibitangazamakuru byo muri Lebanon avuga ko ingabo za Israel zakoze
ibiturika bibiri bikomeye muri Al Mansouri, nyuma y’ibitero bya rutura byari
bimaze iminsi ndetse n’ibitero bitatu by’indege.
Mu
mashusho kandi hagaragara imodoka za gisirikare za Israel zigenda muri Al
Mansouri, mu gihe abasirikare binjiye mu nzu imwe. Ku nyubako imwe hagaragaraga
ibendera rya Israel.
Israel
ivuga ko Al Mansouri iri mu gace kazwi nka “Yellow Line”, aho ingabo zayo zikora ibikorwa
by’umutekano mu majyepfo ya Lebanon.
Ku
wa 5 Kanama, igisirikare cya Israel cyari cyasabye abaturage ba Al Mansouri
kuva mu ngo zabo ako kanya, bakerekeza mu majyaruguru intera nibura ya metero
1,000.
Kuva
icyo gihe, muri ako gace hakomeje kuvugwa ibitero n’isenywa ry’inyubako, aho
ingabo za Israel zagiye zishinja ibikorwa byo gusenya amazu hifashishijwe
n’imashini ziremereye.
Imibare
yatangajwe n’impande zo muri Lebanon ivuga ko hagati ya tariki ya 2 Werurwe na
7 Nzeri, ibikorwa bya gisirikare bya Israel byahitanye abantu 4,381, abandi 12,402 barakomereka.
Ku
ruhande rwa dipolomasi, ibiganiro bitaziguye hagati ya Lebanon na Israel, byari
biteganyijwe i Roma kandi bishyigikiwe na Leta Zunze Ubumwe za Amerika,
byimuriwe mu kwezi k’Ukwakira. Muri ibyo biganiro hazibandwa ku kuba Israel
yava mu majyepfo ya Lebanon, koherezayo ingabo za Lebanon ndetse n’ikibazo
cy’intwaro za Hezbollah.
Lebanon isaba ko ingabo za Israel ziva burundu ku butaka bwayo, mu gihe Israel isaba ingwate z’umutekano ku baturage bayo batuye mu bice by’amajyaruguru.
