Yanditswe na: NDAYISENGA Clement
29/09/2026 09:17
Umunyapolitiki wo mu ishyaka UDPS rya Perezida Félix Tshisekedi muri Repubulika Iharanira Demokarasi ya Congo (RDC), Karondwa Mwanaweka Marie-Célestin Bytaty, yakubiswe bikomeye kugera hafi gupfa nyuma yo kuva mu kiganiro kuri radiyo, aho yari amaze gukangurira abaturage gukurikiza ingamba zo kwirinda Ebola.
Karondwa yari umuyobozi w’agateganyo wa UDPS mu Mujyi wa Butembo, mu Ntara ya Kivu y'Amajyaruguru, ndetse akaba n’umuvugizi w’ishyaka muri ako gace.
UDPS yatangaje ko uyu munyapolitike yibasiwe nyuma yo kugaragaza ko Ebola ihari kandi ko ishobora guteza ikibazo ku baturage. Yari amaze gusaba abaturage gufata ingamba zo kwirinda ikwirakwira ry’iki cyorezo.
Amakuru yatanzwe n’ishyaka avuga ko Karondwa yakubiswe bikomeye, ndetse nyuma y’aho inzu ye iratwikwa, ibintu bye na byo birangizwa.
UDPS yasabye inzego z’ubuyobozi gukora iperereza ku byabaye, kumenya ababigizemo uruhare no kubashyikiriza ubutabera. Iri shyaka kandi ryasabye abayoboke baryo gukomeza gutuza no kubahiriza amategeko.
Uru rugomo rubaye mu gihe abashinzwe ibikorwa byo gukumira Ebola muri RDC na bo bakomeje guhura n’ibibazo by’umutekano.
Ku wa Gatandatu ushize, abantu bitwaje intwaro bateye ahari ikigo cyo gukarabiramo intoki mu Mujyi wa Beni, aho umuntu umwe yishwe abandi bagakomereka.
Ibi bibaye mu gihe Ebola ikomeje gukwirakwira muri RDC. Imibare ya Leta igaragaza ko kugeza ku wa 26 Nzeri 2026, abantu 8,067 bari bamaze kwandura iki cyorezo, mu gihe 3,901 bari bamaze guhitanwa nacyo.
Intara ya Ituri ni yo yibasiwe cyane, aho habaruwe abanduye 6,155, muri bo 2,834 bakaba barapfuye.
Iki cyorezo cyatewe na Ebola yo mu bwoko bwa Bundibugyo, ubwoko bumaze guhitana abantu benshi muri RDC ugereranyije n’ibindi byorezo bya Ebola byigeze kwibasira iki gihugu.
Like This Post? Related Posts
