• Nel Ngabo yatumiwe mu birori bya East Africa Business Network muri Dallas

Umuhanzi nyarwanda Nel Ngabo ategerejwe muri Leta Zunze Ubumwe za Amerika mu ntangiriro z’Ukwakira 2026, aho agiye gutaramira ku nshuro ye ya mbere bigashimangira  iterambere rye mu muziki.

Nel Ngabo uri  muri  Canada yatumiwe kuririmba birori  buzaherekeza inama ya East Africa Business Network  izahuriza hamwe abacuruzi, abashoramari, abayobozi b’ibigo n’abakomoka muri Afurika y’Iburasirazuba batuye muri Amerika n’ahandi ku Isi.

Igitaramo Nel Ngabo azaririmbamo kizaba kigamije gususurutsa abitabiriye umusangiro w’Ihuriro ryitwa “East Africa Business Network (EABN)”, uzaba uri mu bikorwa by’inama ngarukamwaka yaryo yiga ku bucuruzi n’ishoramari.

Yifashishije imbuga nkoranyambaga ze kuri uyu wa 30 Nzeri 2026, Nel Ngabo yasangije integuza y’icyo gitaramo ararikira abatuye i Dallas kuzaza akabataramira.

Yanditse ati: “Dallas bimeze bite? Muzabe muhari mutaramane nanjye muri EABN.”

Biteganyijwe ko icyo gitaramo kizaba mu ijoro risoza inama ya 21 ngarukamwaka ya EABN Trade & Investment Conference, mu ijoro ry’itariki 3 Ukwakira 2026.

Nel Ngabo azwi mu ndirimbo ze zitandukanye zirimo ‘Solo’, ‘Nywe’, ‘Nzahinduka,’ Delicious,’n’izindi zamufashije gukomeza kumenyekana no gukundwa mu muziki w’u Rwanda, kuri ubu akaba abarizwa mu bahanzi bafashwa n’inzu itunganya umuziki ya Kina Music.

East Africa Business Network yatumiye Nel Ngabo ni Umuryango utegamiye kuri Leta ukorera mu gace ka Dallas-Fort Worth, wibanda ku guhuza ba rwiyemezamirimo, abayobozi b’ibigo n’abashoramari bakomoka muri Afurika y’Iburasirazuba n’amahirwe y’imari, ubucuruzi n’ishoramari muri Amerika no ku rwego mpuzamahanga.

 

Like This Post?

• Share On:

Related Posts

---