• U Rwanda na Jordan byasinye amasezerano agamije kwihutisha serivisi za Leta hifashishijwe ikoranabuhanga

U Rwanda na Jordan byasinye amasezerano y’ubufatanye agamije gukomeza guteza imbere serivisi za Leta zitangwa hifashishijwe ikoranabuhanga, ndetse no kwagura ikoreshwa ry’uburyo bwo kumenyekanisha umuntu hifashishijwe ikoranabuhanga, buzwi nka digital identity.

Aya masezerano yasinywe nyuma y’inama yahuje Minisitiri w’Ikoranabuhanga na Inovasiyo w’u Rwanda, Paula Ingabire, na Minisitiri w’Ubukungu bw’Ikoranabuhanga no Guhanga Imirimo muri Jordan, Eng. Sami Smeirat, i New York muri Leta Zunze Ubumwe za Amerika, aho bari bitabiriye ibikorwa bijyanye n’Inteko Rusange y’Umuryango w’Abibumbye.

Ubu bufatanye bwitezweho gutuma ibihugu byombi bikomeza gusangira ubumenyi, ubunararibonye n’ikoranabuhanga mu nzego zitandukanye z’ingenzi mu iterambere ry’ikoranabuhanga.

Kimwe mu bice by’ingenzi bizibandwaho muri aya masezerano ni digital identity, uburyo bufasha umuntu kwemeza umwirondoro we hifashishijwe ikoranabuhanga kugira ngo abashe kubona serivisi zitandukanye.

U Rwanda na Jordan byombi biri mu bihugu bikomeje gushyira imbaraga mu ikoreshwa ry’ikoranabuhanga mu gutanga serivisi za Leta, mu rwego rwo kugabanya ingendo abaturage bakora bajya ku biro bya Leta no kubafasha kubona serivisi mu buryo bwihuse kandi bworoshye.

Mu Jordan, urubuga rwa Sanad Digital ID rutuma abaturage bagera kuri serivisi nyinshi za Leta ndetse n’iz’abikorera, aho ruhuza abakoresha na serivisi zirenga 550 zitangwa n’inzego za Leta ndetse na serivisi zitangwa n’ibigo birenga 50 by’abikorera.

Ubu buryo bufasha abaturage gukoresha ikoranabuhanga mu kubona serivisi zitandukanye, aho gukenera kujya ku biro bya buri rwego rutanga serivisi.

Mu Rwanda na ho ikoreshwa ry’ikoranabuhanga mu gutanga serivisi za Leta ryagutse cyane binyuze ku rubuga rwa Irembo.

Irembo rutuma abaturage basaba kandi bakabona serivisi zitandukanye za Leta hifashishijwe murandasi, bityo ntibibe ngombwa ko buri gihe bajya ku biro by’inzego zibishinzwe.

Iyi gahunda yafashije mu guhindura uburyo abaturage bageramo serivisi, aho ikoranabuhanga ryagiye rikoreshwa mu koroshya uburyo bwo gusaba serivisi no gukurikirana uko zitangwa.

U Rwanda kandi rukomeje guteza imbere gahunda ya digital identity, izafasha abaturage kwemeza umwirondoro wabo mu buryo bw’ikoranabuhanga no gukoresha uwo mwirondoro mu kubona serivisi zitandukanye zitangirwa ku ikoranabuhanga.

Usibye digital identity, amasezerano yasinywe hagati y’u Rwanda na Jordan azibanda no ku bindi bice by’ingenzi bigize ihinduka ry’ikoranabuhanga.

Muri byo harimo ubwenge buhangano (AI), imicungire no kubika amakuru, umutekano w’ikoranabuhanga, kurinda amakuru bwite, ibikorwa remezo by’itumanaho, kwishyurana hakoreshejwe ikoranabuhanga ndetse no guhuza sisitemu zitandukanye z’ikoranabuhanga.

Guhuza sisitemu zitandukanye bizafasha ikoranabuhanga n’inzego zitandukanye guhererekanya amakuru no gukorana mu buryo bworoshye, mu gihe hubahirizwa umutekano n’ubwirinzi bw’amakuru.

Ku bijyanye n’ubwenge buhangano, u Rwanda na Jordan bizasangira ubumenyi n’ubunararibonye ku buryo ubwo buhanga bushobora gukoreshwa mu kunoza serivisi no gushakira ibisubizo ibibazo bitandukanye.

Aya masezerano ntagarukira ku guhanahana ibitekerezo gusa, kuko ateganya n’uburyo inzego z’ibihugu byombi zizajya zisangira ubunararibonye mu bikorwa bifatika.

Harateganywa ingendo zo kwigira ku bandi (study visits) ndetse na gahunda zo gusangira ubumenyi, aho abayobozi n’abakozi bo mu nzego z’ikoranabuhanga bazajya basura ibigo byo mu kindi gihugu kugira ngo bige ku bikorwa n’imikorere yabyo.

Ibi bizatuma u Rwanda na Jordan bigira amahirwe yo kwigira ku byo buri gihugu kimaze kugeraho, ndetse no kurebera hamwe uburyo ibibazo bishobora kugaragara mu itangwa rya serivisi z’ikoranabuhanga byakemurwa.

Aya masezerano aje mu gihe ibihugu byinshi ku Isi bikomeje gushyira imbaraga mu guhindura imikorere ya Leta hifashishijwe ikoranabuhanga.

Intego ni ukugira ngo serivisi zirusheho kuba zihuse, zorohere abaturage kuzigeraho kandi zirusheho kugira umutekano.

Kuva serivisi zitangirwa ku ikoranabuhanga, abaturage bashobora kugabanya igihe n’amafaranga bakoreshaga bajya ku biro bitandukanye bya Leta, mu gihe inzego na zo zibona uburyo bwo kunoza imikorere no gukurikirana serivisi zitangwa.

Ku Rwanda na Jordan, ubu bufatanye butanga umwanya wo kurushaho guteza imbere inzego z’ikoranabuhanga no kwagura serivisi abaturage bashobora kubona hifashishijwe murandasi.

Amasezerano azafasha kandi gukomeza imikoranire mu nzego ziri gutera imbere vuba, zirimo AI, cybersecurity na digital identity, ndetse no guteza imbere uburyo bwo guhererekanya amakuru hagati ya sisitemu zitandukanye.

Intego rusange y’ubu bufatanye ni ugufasha ibihugu byombi gukomeza kubaka serivisi za Leta zihuse, zizewe, zifite umutekano kandi zorohereza abaturage kuzigeraho, mu gihe u Rwanda na Jordan bikomeza gusangira ubumenyi n’ubunararibonye mu rugendo rwo kwihutisha ikoreshwa ry’ikoranabuhanga.

 

 

 

Like This Post?

• Share On:

Related Posts

---