• Guinée: Perezida Mamadi Doumbouya yababariye umunyapolitiki utavuga rumwe n’ubutegetsi, Aliou Bah

Muri Guinée, umunyapolitiki utavuga rumwe n’ubutegetsi, Aliou Bah, yahawe imbabazi na Perezida Mamadi Doumbouya ku wa Gatanu tariki ya 2 Ukwakira 2026, nyuma yo kumara hafi imyaka ibiri afunzwe.

Izi mbabazi zatanzwe mu gihe icyo gihugu cyizihizaga umunsi mukuru wo kwizihiza ubwigenge. Nk’uko bigaragara mu iteka rya Perezida ryasomwe kuri televiziyo y’igihugu, Mamadi Doumbouya yahaye imbabazi imfungwa 217, barimo Aliou Bah.

Aliou Bah uyobora ishyaka Mouvement démocratique libéral, yari yarakatiwe muri Mutarama 2025 igifungo cy’imyaka ibiri, nyuma yo guhamwa n’icyaha cyo “gutuka no gusebya” Perezida Mamadi Doumbouya.

Urukiko rw’Ubujurire rwa Conakry rwemeje icyo gihano muri Gicurasi 2025.

Aliou Bah yari yafunzwe kuva mu Kuboza 2024. Iyo ataza guhabwa imbabazi, byari biteganyijwe ko azarangiza igihano cye ahagana mu Kuboza 2026.

Imbabazi zatanzwe kuri Aliou Bah zibaye mu gihe ikibazo cye cyari kiri gukurikiranwa n’Urukiko rw’Umuryango w’Ubukungu bw’Afurika y’Iburengerazuba, CEDEAO.

Mu ibaruwa yo ku wa 25 Nzeri, uru rukiko rwari rwasabye Urukiko rw’Ikirenga rwa Guinée kurekura Aliou Bah “ako kanya kandi nta yandi mabwiriza cyangwa ibisabwa”.

Icyemezo cyo kumuha imbabazi rero cyaje mu gihe uru rubanza rwari rugikurikiranwa ku rwego rw’akarere.

Guinée iyobowe na Jenerali Mamadi Doumbouya, wafashe ubutegetsi mu 2021 nyuma yo gukuraho ku butegetsi Alpha Condé, wari Perezida wa mbere wa Guinée watowe mu buryo bw’amatora asanzwe.

Mu Kuboza 2025, Doumbouya yaguye  butegetsi nyuma yo gutegura amatora ya Perezida, aho amashyaka atavuga rumwe n’ubutegetsi atari afite umukandida ukomeye ushobora guhangana na we.

Kuva Mamadi Doumbouya yafata ubutegetsi, amashyaka akomeye ya politiki amwe n’amwe yarasheshwe, mu gihe imyigaragambyo yabujijwe muri  icyo gihugu

Hari kandi abanyapolitiki n’abandi bantu batavuga rumwe n’ubutegetsi bafunzwe, bakatirwa n’inkiko, abandi bahatirwa kujya mu buhungiro, mu gihe hari n’abandi bivugwa ko baburiwe irengero.

Kurekurwa kwa Aliou Bah, nyuma yo guhabwa imbabazi na Perezida, ni intambwe nshya ibaye mu rubanza rwe rwari rumaze igihe rukurikiranwa n’inzego z’ubutabera muri Guinée ndetse n’Urukiko rwa CEDEAO.

 

Like This Post?

• Share On:

Related Posts

---