• Paris: Polisi yatatanyije abari mu cyunamo cy’umusore wishwe arasiwe mu myigaragambyo

Polisi y’u Bufaransa yatatanyije abantu bari bateraniye i Paris ku mugoroba wo ku wa Mbere, tariki ya 26 Ukwakira 2026, mu gikorwa cyo kwibuka Pengo Bossio Wangi, umukinnyi ukiri muto w’imikino njyarugamba ya MMA, wishwe arashwe mu gitero gikekwa ko cyari gishingiye ku ivangura ry’amoko.

Amashusho yafashwe aho byabereye agaragaza abapolisi biruka berekeza ku bigaragambyaga, babasubiza inyuma. Umwe mu bari muri iyo myigaragambyo yagaragaye afite ibikomere ku mutwe, ari kwitabwaho n’umuganga.

Iki gikorwa cyateguwe n’imiryango irimo SOS Racisme, Umuryango uharanira Uburenganzira bwa Muntu mu Bufaransa, amashyirahamwe y’abakozi n’indi miryango itegamiye kuri Leta, mu rwego rwo kwibuka Wangi wari ufite imyaka 26, ukomoka muri Repubulika Iharanira Demokarasi ya Congo.

Wangi yishwe ku wa 23 Ukwakira 2026, ubwo umuntu witwaje imbunda yarasaga ahantu hatandukanye mu mijyi ya Trappes na La Verrière, mu burengerazuba bwa Paris. Nk’uko Ubushinjacyaha bw’u Bufaransa bushinzwe kurwanya iterabwoba bwabitangaje, abantu barindwi bakomerekeye muri ibyo bitero, bane muri bo bakomereka bikomeye.

Mu bakomeretse harimo umukobwa w’imyaka 11, mu gihe undi w’imyaka 12 na we yari yibasiwe, ariko ntiyagira igikomere ku mubiri.

Umugabo w’imyaka 39 ukekwaho kugira uruhare muri ibyo bitero yongeye gushyirwa mu maboko ya polisi ku wa Mbere, nyuma yo gusuzumwa n’inzobere mu buzima bwo mu mutwe.

Ubushinjacyaha bw’u Bufaransa burimo gukora iperereza kuri ibyo bitero, bukabikurikirana nk’ibyaha bishobora kuba bifitanye isano n’iterabwoba kandi byongerewe uburemere n’impamvu z’ivangura ry’amoko. Icyakora, ukekwaho kubikora ahakana ko ibikorwa bye byari bifite aho bihuriye n’ivangura.

Nta makuru yahise atangazwa agaragaza niba hari abantu bafashwe mu gihe cy’imyigaragambyo yabereye i Paris ku wa Mbere.

Like This Post?

• Share On:

Related Posts

---