• Perezida Kagame na Madamu Jeannette Kagame bageze muri Cambodia mu ruzinduko rw’akazi

Perezida wa Repubulika Paul Kagame, na Madamu Jeannette Kagame bageze mu mujyi wa Phnom Penh, muri Cambodia, aho batangiye mu ruzinduko rw’akazi , mbere yo kwitabira Inama ya 20 y’Umuryango w’Ibihugu bikoresha Igifaransa (Francophonie).

Uru ruzinduko rugamije gukomeza gushimangira umubano n’ubufatanye hagati y’u Rwanda na Cambodia, mu gihe iki gihugu cyitegura kwakira abakuru b’ibihugu na za guverinoma bazitabira iyi nama mpuzamahanga.

Mu ruzinduko rwe, Perezida Kagame ateganyijwe kugirana ibiganiro n’Umwami wa Cambodia, Norodom Sihamoni, ndetse n’abandi bayobozi bakuru barimo Minisitiri w’Intebe Hun Manet, Perezida wa Sena Hun Sen na Perezida w’Inteko Ishinga Amategeko, Khuon Sudary.

Ibiganiro biteganyijwe kwibanda ku gushimangira umubano w’ibihugu byombi no kwagura ubufatanye mu nzego zitandukanye.

Amakuru yatangajwe na Minisiteri y’Ububanyi n’Amahanga ya Cambodia avuga ko impande zombi ziteganya gusinya amasezerano n'inyandiko z'ubufatanye mu nzego zirimo ubucuruzi, ishoramari, ubwikorezi bwo mu kirere n'ubukerarugendo.

Biteganyijwe ko Perezida Kagame  azitabira kandi inama ya 20 ya Francophonie izahuza abakuru b’ibihugu na za guverinoma, hamwe n'abandi bahagarariye ibihugu bigize uyu muryango, baganire ku bufatanye mpuzamahanga, amahoro, iterambere rirambye n'ibindi bibazo bireba isi.

Iyi nama izaba ari iya mbere ibereye muri Cambodia, ikazaba umwanya wo gukomeza ibiganiro n'imikoranire hagati y'ibihugu bihuriye ku gukoresha ururimi rw'Igifaransa.

Mu bindi biteyanjiwe muri  iyo nama n Amatora y’uzasimbura Umunyamabanga Mukuru wa OIF Madamu Mushikiwabo Louise uyoboye  uyu muryango ku tariki ya 3 Mutarama 2019 kugeza ubu akaba yari amaze manda ebyiri zose awuyobora akaba anahabwa amahirwe yo kuwuyobora kuri manda ya 3

U Rwanda na Cambodia bisanzwe bifitanye umubano wa dipolomasi watangiye mu 2005, kandi uru ruzinduko rutegerejweho kuwukomeza no gufungura andi mahirwe y'ubufatanye.

Inama ya 20 ya Francophonie iteganyijwe kubera i Phnom Penh kuva ku wa 14 kugeza ku wa 16 Ugushyingo 2026.

 

Like This Post?

• Share On:

Related Posts

---