Perezida wa
Leta Zunze Ubumwe za Amerika, Donald Trump, yagaragaje ko afitanye umubano
mwiza na Perezida w’u Burusiya, Vladimir Putin, ubwo bahuriraga mu mujyi wa
Shenzhen mu Bushinwa, ku wa Kane tariki ya 19 Ugushyingo 2026.
Trump
yakiriye Putin amwenyura, amwerekezaho urutoki maze abwira abanyamakuru ati:
“Uyu ni nde? Ni inshuti yanjye.” Nyuma y’ayo magambo, bombi bahanye ikiganza mu
buryo bugaragaza ubusabane.
Aba bayobozi
bombi bahuriye mu nyubako ya Kylin Villa, aho bagiranye ibiganiro byamaze hafi
iminota 40, mbere y’uko hategurwa inama yahuje Trump, Putin na Perezida w’u
Bushinwa, Xi Jinping.
Mu magambo
ye, Trump yavuze ko amaze imyaka myinshi afitanye umubano mwiza na Putin, kandi
ko yizeye ko ibiganiro byabo bizatanga umusaruro mwiza.
Yagize ati:
“Tumaze imyaka myinshi dufitanye umubano mwiza. Turaziranye kuva kera, kandi
ntekereza ko muri ibi biganiro hashobora kuvamo ibintu byinshi byiza.”
Iyi nama
yabaye mu gihe intambara yo muri Ukraine ikomeje, ndetse umubano hagati y’u
Burusiya n’ibihugu byo mu Burengerazuba bw’Isi ukomeje kurangwa n’amakimbirane.
Guhura kwa
Trump na Putin i Shenzhen kwabaye inama yabo ya mbere ikomeye kuva bahurira
muri Alaska mu 2025, aho baganiriye ku gushaka umuti w’intambara yo muri
Ukraine ariko ntibagire amasezerano afatika bageraho.
Nyuma
y’ibiganiro byabo, Trump na Putin bari biteganyijwe guhura na Xi Jinping mu
nama idasanzwe ihuza abayobozi b’ibihugu bitatu bikomeye ku Isi.
Ibiganiro
byabo byari biteganyijwe kwibanda ku bibazo by’umutekano mpuzamahanga,
intambara zo muri Ukraine no mu Burasirazuba bwo Hagati, kugenzura intwaro
kirimbuzi ndetse n’imibanire mu bukungu n’ikoranabuhanga.
Iyi nama
ikurikiranwe cyane n’ibihugu bitandukanye, cyane cyane Ukraine n’ibihugu by’i
Burayi, bifite impungenge z’uko ibyemezo byafatirwa mu biganiro by’ibihugu
bikomeye bishobora kugira ingaruka ku mutekano w’akarere kabo.