Yanditswe na: NSENGIYUMVA J Damascene
12/01/2026 11:26
Guverinoma ya Sudani yatangaje ko yasubiye gukorera mu murwa mukuru w’igihugu, Khartoum, nyuma y’imyaka hafi itatu, itahakandangira kubera imirwano ikomeye ikomeje kubahanganisha n’Ingabo zo mu mutwe wa Rapid Support Forces (RSF).
Minisitiri w’Intebe wa Sudani, Kamil Idris, ku
Cyumweru tariki ya 11 Mutarama 2025, yatangaje ko ku mugaragaro bamaze gusubira
i Khartoum, kandi ko bagiye gutangira gushyira imbaraga mu kunoza serivisi
zihabwa abaturage b’uwo mujyi bamaze igihe mu bihe bikomeye.
Ingabo za Leta zari zarirukanwe
n’umutwe witwaje intwaro wa Rapid Support Forces (RSF) kuva mu 2023. Muri
2025 nibwo Ingabo za Leta zisubije ubugenzuzi kuri uwo Mujyi ariko ibiteroshuma
bya RSF byakomeje kwiyongera, ibyatumye Leta itinya kuhagaruka.
Intambara muri Sudan yarubuye kuva
muri Mata 2023, nyuma y’uko habayeho kutumvikana hagati y’Umugaba Mukuru
w’Ingabo za Leta, Gen. Abdel-Fattah Burhan, n’uwahoze ari umwungiriza we Gen.
Mohammed Hamdan Dagalo, uzwi cyane ku izina rya Hemedti, usigaye uyobora umutwe
wa Rapid Support Forces.
Aba bagabo bombi bafatanyije mu
guhirika ku butegetsi uwari Perezida Omar al-Bashir mu 2019, ndetse nyuma
banakorana mu guhirika ubutegetsi bw’abasivili mu 2021.
Nyuma barashyamiranye bishingiye ku
kukunanirwa gusaranganya ubutegetsi mu ngabo no mu nzego za gisivili.
Umuryango w’Abibumbye uvuga ko abantu
barenga miliyoni 14 bamaze kuva mu byabo,abandi barenga 40.000 bamaze kwicwa.
