• Urukiko rwisumbuye rwa Nyarugenge rwategetse ko Barafinda, aguma mu gifungo cy’agateganyo

Urukiko Rwisumbuye rwa Nyarugenge rwanzuye ko ubujurire bwa Barafinda Sekikubo Fred ku cyemezo kimufunga iminsi 30 y’agateganyo nta shingiro bufite, bityo rutegeka ko akomeza gufungwa iyo minsi mu gihe iperereza ku byaha akurikiranyweho rikomeje.

Barafinda akurikiranyweho icyaha cyo gukwirakwiza amakuru y’ibihuha, bivugwa ko yakoraga akoresheje imbuga nkoranyambaga, by’umwihariko ku rubuga rwa YouTube aho yanyuzaga ibiganiro bitandukanye.

Urukiko rwasanze impamvu yatanzwe n’ubushinjacyaha igaragaza ko hari impamvu zifatika zituma akomeza gufungwa by’agateganyo, zirimo gukomeza iperereza no kwirinda ko ashobora kubangamira iperereza rikiri gukorwa.

Dosiye ya Barafinda ayihuriyemo n’abandi barimo Mazimpaka Patrick, Nizeyimana Didier uzwi nka Mucoma, Nkeramihigo Japhet na Tumukunde Djuma.

Aba bo bari barajuririye icyemezo cyari cyabafunze by’agateganyo, ariko Urukiko Rwisumbuye rwa Nyarugenge rutegeka ko bafungurwa by’agateganyo mu gihe iperereza ku byaha bakekwaho rikomeje.

Icyemezo cy’urukiko gisobanuye ko nubwo dosiye yabo ihuriye hamwe, ibimenyetso n’impamvu z’ifungwa ry’agateganyo byasuzumwe kuri buri muntu ku giti cye, ari na yo mpamvu imyanzuro itandukanye.

Urwego rw’ubutabera rukomeje iperereza kuri iyi dosiye kugira ngo hamenyekane neza niba abo baregwa bakoze ibyaha bakekwaho bijyanye no gukwirakwiza amakuru y’ibihuha binyuze ku mbuga nkoranyambaga.

Mu mategeko y’u Rwanda, gukwirakwiza amakuru y’ibihuha bishobora guteza imvururu cyangwa guhungabanya ituze rya rubanda bifatwa nk’icyaha gishobora guhanishwa igifungo n’ihazabu igihe bigaragaye ko uwabikoze yabigambiriye.

Urubanza ruzakomeza kuburanishwa mu nkiko mu gihe iperereza ririmo gukorwa ku buryo bwimbitse kugira ngo hafatwe umwanzuro wa nyuma ku byaha baregwa.

Like This Post?

• Share On:

Related Posts

---